Pagsasaritaan ti Filipinas ken Estados Unidos (US) ti pannakapalawa iti interpretasion ti Mutual Defense Treaty (MDT) dagiti dua a pagilian, kas kinuna ni Secretary ti Department of National Defense (DND) Gilberto Teodoro Jr. idi Agosto 27, 2024.
Nabuangay ti MDT ti Filipinas ken Estados Unidos idi 1951 a kas katulagan ti panangdepensada iti tunggal maysa nga agsagrap iti armado a panangraut.
Maibatay iti MDT, masapul nga agtinnulong ti Filipinas ken Estados Unidos no adda mangraut iti Filipinas wenno iti Estados Unidos.
Kiniddaw ni Secretary Teodoro a palawaen pay koma ti interpretasion ti MDT ti Filipinas ken US tapno mabalinda a sarangten ti nabileg ken nasikap a kabusor.
COC ni Doc Willie Ong a para senador, impila ti asawana
Inanamongan ni panakangiwat ti National Maritime Council (NMC) Alexander Lopez ti pannakapabaro iti 73-tawenen nga MDT, ket kinunana nga adun ti nagbaliw ket addan baro a pangta iti seguridad.
Kinuna ni US Indo-Pacific Commander Admiral Samuel Paparo a silulukat ti armada ti US iti posible a panangkadua daytoy iti barko ti Filipinas iti West Philippine Sea (WPS), kas paset ti MDT.
Impaganetget ti Estados Unidos a ti armado a panangraut iti armada, barko, wenno eroplano ti Filipinas iti Pasipiko, agraman iti WPS, ket mangtignay iti panangtungpal ti US iti tulag. (Martin Sadongdong/Manila Bulletin//Lito Hilidon/Bannawag)
