Kaso a Money Laundering ti mabalin nga ipila ti Department of Justice (DOJ) maibusor ken ni dati a Mayor ti Bamban, Tarlac Alice L. Guo ken iti kabsatna a ni Shiela.
Segun ken ni Undersecretary ti DOJ Nicholas Felix L. Ty idi Agosto 29, 2024, isagsaganan ti DOJ ti kaso a money laundering kontra kada Alice, Shiela, ken dadduma pay a kakumplotda ket mabalin a maidatag daytoy inton sumaruno a lawas.
Sakbay daytoy, indarum ti DOJ ni Shiela gapu iti dina panangikankano iti summon ti Senado, a pananglabsing iti Article 150 of the Revised Penal Code (RPC); ken iti panagusar iti peke a pasaporte ti Filipinas a pananglabsing iti Section 22, paragraph (b)(2) ti Republic Act (RA) No. 11983, wenno ti Philippine Passport Act.
Naisaklang met ni Alice iti DOJ gapu iti kaso a qualified trafficking in persons nga impila ti Philippine National Police-Criminal Investigation and Detection Group (PNP-CIDG) ken ti Presidential Anti-Organized Crime Commission (PAOCC).
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna ni Ty a saan pay a masinunuo no mabalin a tumakder ni Shiela a kas state witness.
Panggep pay ti DOJ ti mangipila iti kaso iti Korte Suprema wenno iti Integrated Bar of the Philippines (IBP) kontra kadagiti abogado ni Alice, ta palsipikado dagiti intedda a counter-affidavit. (Jeffrey Damicog/Manila Bulletin//Lito Hilidon/Bannawag)
