Naduktalan dagiti polis dagiti narikut a pagnaan iti uneg ti daga, eksplosibo, ken napipigsa nga armas iti sakupen ti Kingdom of Jesus Christ (KOJC) iti Davao City, bayat ti agtultuloy a panangsawarda ken ni Pastor Apollo Quiboloy.
Iti press briefing iti Camp Crame idi Agosto 29, 2024, imparang ni Secretary ti Department of the Interior and Local Government (DILG) Benjamin Abalos Jr. dagiti video a naala dagiti polis iti umuna nga aldaw ti panangsawarda, a mangipakpakita iti narikut a disenio dagiti pasdek iti 30-ektaria a daga.
Segun ken ni Abalos, natakuatan pay dagiti polis ti nalimed a pagnaan a mapan iti maysa a siled ken adda pay 42 a pasdek iti solar ti KOJC.
Kinuna ni Abalos nga makium-umandan iti Engineering Office ti Davao City no naideklarar met laeng dagitoy iti plano ti pasdek.
COC ni Doc Willie Ong a para senador, impila ti asawana
Impakita pay ni Abalos ti ladawan dagiti Molotov bomb ken buneng a nasarakan dagiti polis iti tuktok ti maysa a pasdek.
Saanna nga impakita amin a video a naala dagiti polis tapno saan a makompromiso ti operasionda.
Segun ken ni Spokesperson ti Police Regional Office (PRO) 11 (Davao) Maj. Catherine Dela Rey, agtalekda nga adda ni Quiboloy iti solar ti KOJC.
Kinuna pay ni Dela Rey a saan a dagiti pasdek, wenno simbaan, wenno dagiti kameng ti KOJC ti ranta dagiti polis, no di ket ti pannakaipatungpal iti warrant of arrest nga impaulog ti korte.(Christopher Lloyd Caliwan/PNA//Lito Hilidon/Bannawag)
