Addan iti Signal No. 2 dagiti dadduma a paset ti Luzon kalpasan a pimmigsa ni Bagyo Enteng, segun iti Philippine Atmospheric, Geophysical and Astronomical Services Administration (PAGASA) itay Septiembre 2, 2024.
Imet ni Bagyo Enteng (internasional a nagan "Yagi") ti kapigsa a 75 kilometers per hour (kph) iti asideg ti sentrona ken pugso nga agingga iti 90 kph. Nasaripatpatan daytoy iti baybay ti Vinzons, Camarines Norte.
Adda iti Signal No. 2 dagiti amianan a daya ti Camarines Norte ken Camarines Sur, ken ti daya a paset ti Cagayan agraman ti Babuyan Island, Isabela, Quirino, ken Kalinga.
Naisaad met ti Signal No. 1 kadagiti abagatan a paset ti Batanes; daya a paset ti Ilocos Norte; daya a paset ti Abra; dadduma pay a paset ti Cagayan, Isabela, ken Quirino; daya a paset ti Nueva Vizcaya; dadduma pay a paset ti Aurora, daya a paset ti Nueva Ecija; daya a paset ti Bulacan; daya a paset ti Rizal ken Laguna; ti amianan ken abagatan a paset ti Quezon, Marinduque, dadduma a paset ti Camarines Norte, Camarines Sur, Albay, Sorsogon, Catanduanes, ken ti amianan a paset ti Masbate agraman ti Ticao ken Burias Island.
COC ni Doc Willie Ong a para senador, impila ti asawana
Pakaruen ti Bagyo Enteng ti abagat a mangyeg iti bayakabak iti Ilocos Region, Zambales, Bataan, Pampanga, Aurora, Bulacan, Metro Manila, CALABARZON, MIMAROPA, Bicol Region ken iti Visayas.
Iti sabali a bangir, impakaammo ti National Disaster Risk Reduction and Management Council (NDRRMC) nga addan 14 a pamilia (wenno 63 a katao) a naapektaran iti tallo a barangay iti Central Visayas. Siam a pamilia ti naipanen iti pagbakuitan.
Iti CALABARZON ken Bicol Region, agdagup iti 739 a pasahero ti nalakon kadagiti nadumaduma a pantalan, gapu iti pannakaisardeng ti biahe dagiti barko.
Binilin ti Office of Civil Defense (OCD) dagiti amin a regional office a bantayanda ti situasion ken siguraduenda ti naan-anay a panangresponde no kasapulan. (Ma. Cristina Arayata/PNA//Lito Hilidon/Bannawag)
