Pimmardas ni Bagyo Enteng (internasional a nagan "Yagi") bayat ti panagballasiwna iti amianan a Luzon ket nagturong iti West Philippine Sea (WPS) itay agsapa ti Septiembre 3, 2024, segun iti Philippine Atmospheric, Geophysical and Astronomical Services Administration (PAGASA).
Itay 5:00 ti parbangon, nasaripatpatan ti sentro ti bagyo iti baybay ti Paoay, Ilocos Norte.
Agturong ni Enteng iti laud-amianan a laud iti kapardas a 25 kilometers per hour (kph), ken iti kapigsa a 75 kph iti asideg ti sentrona ken pugso nga agingga iti 125 kph.
Manamnama nga agpalpalaud pay ni Enteng iti WPS agingga a rummuar daytoy iti Philippine Area of Responsibility inton Septiembre 4.
COC ni Doc Willie Ong a para senador, impila ti asawana
Agtalinaed ti Tropical Cyclone Wind Signal (TCWS) No. 2 iti Ilocos Norte, amianan a paset ti Ilocos Sur, Apayao, Abra, Kalinga, ken iti laud a paset ti Cagayan agraman ti Babuyan Island.
Signal No. 1 latta kadagiti nadumaduma a paset ti amianan a Luzon kas iti dadduma pay a paset ti Ilocos Sur, amianan a paset ti La Union, Mountain Province, Ifugao, amianan a paset ti Benguet, Batanes, dadduma pay a paset ti Cagayan, dadduma pay a paset ti Babuyan Island, Isabela, amianan a paset ti Nueva Vizcaya, ken ti amianan a paset ti Quirino.
Guyoden pay ni Enteng ti abagat a mangyeg iti napigsa a tudo iti Ilocos Region, Apayao, Abra, Benguet, Zambales, Bataan, ken Occidental Mindoro.
Kalalainganna agingga napigsa a tudo ti sagrapen dagiti adda iti Cagayan Valley, Cordillera Administrative Region, Nueva Ecija, Tarlac, Pampanga, Bulacan, Metro Manila, Rizal, Cavite, Batangas, Laguna, ken iti amianan a Palawan (agraman Calamian, Cuyo, ken Cagayancillo Islands). (Ellalyn De Vera-Ruiz/Manila Bulletin//Lito Hilidon/Bannawag)
