Kalpasan ti makalawas a panangsawar ti Philippine National Police (PNP) iti solar ti Kingdom of Jesus Christ (KOJC) iti Davao City, pinalagipan ti Commission on Human Rights (CHR) dagiti polis nga agpatingga laeng ti operasionda iti pannakaipatungpal ti arrest warrant, a saan ket a search warrant.
Segun iti CHR Region XI, palpaliiwenda dagiti mapaspasamak iti uneg ken ruar ti solar ti KOJC ken imbestigarenda no adda nalabsing a karbengan ti tao.
Sinarungkaran dagiti imbestigador ken abogado ti CHR Region XI dagiti kameng ti KOJC a naipupok iti Davao City Police Office (DCPO) a natiliw idi Agosto 24 ken 26. Nakasaritada pay dagiti maipagarup a biktima ti panangriribuk dagiti polis.
Impalagip ti CHR iti PNP a kitaen daytoy no malabsing ti “karbengan ti tao iti panagdaydayaw” bayat ti panangipatungpalda iti warrant of arrest.
Mangnamnama ni Marcos iti pannakaisubli ti panangipateg ni Pinoy iti arte a Filipino
Iti sabali a bangir, binalakadan met ti CHR dagiti kameng ti KOJC a saanda a lapdan dagiti polis iti pagrebbenganda a mangipatungpal iti warrant of arrest, ken liklikanda dagiti aramid a mangpabayag iti panangsawarda ken ni Quiboloy ken kadagiti kakadua daytoy a naidarum.
Kiniddaw pay ti CHR a liklikan ti amin ti agisaknap kadagiti palso nga impormasion mainaig iti mapaspasamak nga operasion dagiti polis a mabalin a manglapped iti nainkalintegan a pannakaipatungpal ti warrant of arrest, mangikompromiso iti kinatalged dagiti amin a maseknan, ken manglabsing iti karbengan dagiti tao.
Mangnamnama met ti CHR a tungpalen ni Quiboloy ti sinaona idi a sanguenna dagiti kasona iti sadino man a lugar ken ania man nga oras iti korte ket iti kasta, magna ti sistema ti hustisia ti pagilian. (Czarina Nicole Ong Ki/Manila Bulletin//Lito Hilidon/Bannawag)
