Winaswas ti Court of Appeals (CA) iti Cagayan de Oro ti Temporary Protection Order (TPO) nga impaulog ti korte ti Davao para iti Kingdom of Jesus Christ (KOJC) mainaig iti operasion ti polisia a panangsawar ken ni Pastor Apollo Quiboloy.
Segun iti impaulog ti CA itay Septiembre 3, 2024, inyallatiwen ti Korte Suprema ti kaso ni Quiboloy iti Quezon City Regional Trial Court (RTC) isu nga awanen ti karbengan ni Davao RTC Br.15 Judge Mario C. Duaves a mangiruar iti TPO maibusor iti operasion ti Philippine National Police (PNP) idi Agosto 27.
Kinuna ni Public Information Office chief ti PNP Col. Jean Fajardo a ti pangngeddeng ti CA ti mangipaneknek a nainkalintegan ti ar-aramiden ti PNP a panangipatungpal iti warrant of arrest ni Quiboloy.
Impaganetget ni Fajardo nga awan ti epekto ti TPO iti panangsawarda ken ni Quiboloy, idinto nga awan ti legal a pakaibatayan ti TPO nga impaulog ti Davao RTC, kas inkeddeng ti CA. (Benjamin Pulta/PNA//Lito Hilidon/Bannawag)
