Imparang da Secretary ti DILG Benhur Abalos, hepe ti PNP PGen Francisco Marbil, ken Director ti PRO-11 PBGen Nicolas Torre kadagiti kameng ti prensa ni pangulo ti KOJC Pastor Apollo Quiboloy ken dagiti kakaduana a naidarum itay Septiembre 9 iti Camp Crame.

Rumbeng a sanguen nga umuna ni pangulo ti Kingdom of Jesus Christ (KOJC) Pastor Apollo Quiboloy dagiti kasona iti Filipinas sakbay a mayawat iti Estados Unidos (US), segun iti Department of Justice (DOJ) itay Septiembre 9, 2024.

Dinayaw ni Presidente Ferdinand Marcos Jr. (PBBM) ti Philippine National Police (PNP) iti pannakatiliw da Quiboloy ken dagiti kakaduana iti solar ti KOJC sadiay Davao City itay Septiembre 8.

Inlawlawag ni Presidente Marcos a saan pay a kiniddaw ti US ti ekstradision ni Quiboloy ngem nasken a mabista, ket no matakuatan a nakabasol, madusa, nga umuna ni Quiboloy iti Filipinas sakbay a mayawat iti US.

Naidarum ni Quiboloy iti kaso a conspiracy to engage in sex trafficking by force, fraud, coercion ken sex trafficking kadagiti ubbing; conspiracy; ken bulk cash smuggling iti US.

Nasional

Pakaisukatan ti Doliar iti Pisos iti Nobiembre 25, 2024

Inlawlawag ni Presidente Marcos a ti pannakaarestar ni Quiboloy ket gapu iti operasion ti PNP, idinto a nagpaay a katulonganda dagiti kameng ti Armed Forces of the Philippines (AFP).

Segun ken ni PBBM, nupay adu dagiti timmulong nga ahensia ti gobierno iti pannakatiliw ni Quiboloy, ti operasion nga inwayat ti PNP ti nangitunda iti isusuko daytoy. (Benjamin Pulta/PNA//Lito Hilidon/Bannawag)