Aramiden ti Department of National Defense (DND) amin a kabaelanna a mangsupiat iti ania man a kiddaw ti kampo ni pangulo ti Kingdom of Jesus Christ (KOJC) Pastor Apollo Quiboloy a mayakar daytoy iti pagpupokan ti Armed Forces of the Philippines (AFP).
Segun ken ni panakangiwat ti DND Director Arsenio Andolong itay Septiembre 9, 2024, supiaten ti DND ti ania man a mosion a mayakar ni Quiboloy iti poder ti AFP.
Impakdaarna daytoy kalpasan a maipadamag ti panggep ni Atty. Israelito Torreon a mayallatiw ni Quiboloy manipud iti Custodial Center ti Philippine National Police (PNP) iti ania man a pasilidad ti AFP, gapu iti "pangta iti seguridad."
Ngem impaganetget ni Andolong a nainget ti seguridad kadagiti pasilidad ti AFP, ken saan a daytoy ti umisu nga ahensia a mangaywan kadagiti suspek iti kaso a kriminal.
Pakaisukatan ti Doliar iti Pisos iti Nobiembre 25, 2024
Itay kallabes, kinompirmar ti AFP a timmulong daytoy iti operasion ti PNP iti solar ti KOJC iti Davao City a nangitunda iti pannakakemmeg da Quiboloy ken ti uppat a kakaduana a da Crisente Canada, Ingrid Canada, Sylvia Cemañes, ken Jackielyn Roy.
Naidarumda amin iti kaso a panaglabsing iti Anti-Trafficking in Person Act of 2023, idinto a panaglabsing iti Republic Act 7610 wenno ti Special Protection of Children Against Abuse, Exploitation and Discrimination Act ti nakaidaruman ni Quiboloy. (Martin Sadongdong/Manila Bulletin//Lito Hilidon/Bannawag)
