Nagkedked manen ni Bise Presidente (BP) Sara Duterte a mangilawlawag iti singasing a badiet ti Office of the Vice President (OVP) para iti 2025 nga aggatad iti PhP2.037 a bilion.
Impakaammo ti OVP ti saan nga idadar-ay ni BP Duterte iti panangbista ti Committee on Appropriations ti Kamara iti singasing a badiet a naituding ita nga aldaw, Septiembre 10, 2024.
Iti surat nga indatag ni Duterte ken ni House Speaker Martin Romualdez, kinunana nga itaklinnan iti komite ti pannakaaprobar ti badiet ti OVP.
Segun ken ni BP Duterte, indatagnan iti Kamara dagiti kasapulan a dokumento mainaig iti singasing a badiet ket impaganetgetna ti takderna kadagiti sinaona iti napalabas a pannakabista idi Agosto 27.
Pakaisukatan ti Doliar iti Pisos iti Nobiembre 25, 2024
Iti nasao a pannakabista ti badiet ti OVP, naitantan ti pannakaaprobar daytoy gapu iti panagkedked ni BP Duterte a mangsungbat kadagiti saludsod dagiti diputado.
Kasungani daytoy iti naaramid kadagiti badiet ti OVP para iti 2023 ken 2024 a nakairamanan ti kontrobersial a Confidential Fund. (Raymund Antonio/Manila Bulletin//Lito Hilidon/Bannawag)
