Maysa a balligi para kadagiti mapapati a biktimana ti pannakaarestar ni Kingdom of Jesus Christ (KOJC) Pastor Apollo Quiboloy, segun ken ni House Deputy Majority Leader Tingog Party-list Rep. Jude Acidre, maysa a mangsupsuportar iti pagimbagan ken karbangan dagiti ubbing ken babbai.
Masansan a maaw-awagan ni Quiboloy a kas nangiproklamar iti bagbagina a "Natudingan nga Anak ti Dios" ken addaan iti adu a panatiko a pasurot. Sidadarum ti pastor kadagiti kaso ti panagabuso iti ubbing, panagabuso a seksual, ken human trafficking.
Kinuna met ti Philippine National Police (PNP) idi Septiembre 11, 2024 nga adu pay a naubbing pay a babbai ti dimmatag iti PNP tapno ipalgak dagitoy dagiti mapapati a sinagrapda a panangabuso kadakuada ni Quiboloy. (MANILA BULLETIN)
