Aganay a PhP158 a milion ti gatad ti tulong a naipaay kadagiti mannalon iti Mariano Marcos State University Siudad iti Siudad ti Batac iti Ilocos Norte itay Septiembre 11, 2024, kas panangrambak iti maika-107 a kasangay ni dati a Presidente Ferdinand Marcos Sr.
Indauluan ni Presidente Ferdinand Marcos Jr. (PBBM) ti pannakayawat dagiti makinaria, bukbukel, ganagan, tulong a para gasolina, ken solar-powered nga irrigation system kadagiti agarup 1,000 a kameng ti nadumaduma a gunglo dagiti mannalon iti probinsia.
Segun ken ni PBBM, insayangkat ti Department of Agriculture (DA) ken ti gobierno probinsial ti Ilocos Norte daytoy a proyekto tapno mapasayaat ti partuat ti agrikultura ken pangtulong iti ibabangon dagiti naapektaran ti didigra iti rehion.
Malaksid iti daytoy, indauluan pay ni PBBM ti pormal a pannakayawat dagiti 69 nga ambulansia nga impaay ti Philippine Charity Sweepstakes Office (PCSO) kadagiti nadumaduma nga ili ti Ilocos Norte. (Betheena Unite/Manila Bulletin//Lito Hilidon/Bannawag)
