Iti baet dagiti saritaan a panggep ti Kamara dagiti Representante nga ipaayan ti Opisina ti Bise Presidente iti nababbaba a badiet para iti 2025, kinuna ni Bise Presidente Sara Duterte a nakasagana isuna ken ti opisinana nga agtrabaho uray awan ti pondo nga aggapu iti gobierno.
Posible a maikkatan wenno makissayan iti pondo ti Opisina ti Bise Presidente kalpasan a saan a pulos a nagpakita ni Duterte iti maikadua a hearing ti Kamara idi Septiembre 10 para iti idawdawat ti nasao nga opisina a PhP2.037 a bilion a badiet para iti 2025.
Kas sungbat iti imbatad ni Duterte, kinuna met ni Senate Minority Leader Aquilino Pimentel III idi Septiembre 11, a masapul a maikkan ti Opisina ti Bise Presidente iti makaanay a badiet tapno mapataray daytoy dagiti konstitusional nga akemna.
Kinuna met ni House Deputy Majority Leader ken Tingog Party-list Rep. Jude Acidre a ti "naigaggagara a di panangikabkabilangan" ni Duterte kadagiti panagpapatang maipanggep iti badiet ti opisina daytoy ket maysa a "naipanurok a panangbaybay-a" iti konstitusional a pagrebbenganna (Duterte) tapno masigurado ti transparency iti panagusar kadagiti publiko a pondo. (MANILA BULLETIN)
