Panggep ti Kamara nga aprobaran ti singasing a PhP6.352 a trilion a nailian a badiet para iti 2025 iti maikatlo ken maudi a pnnakaibasana inton Septiembre 25, kas impakaammo ni Diputado ti Marikina City 2nd district Stella Quimbo.
Segun ken ni Dip. Quimbo a senior vice chairperson ti House Committee on Appropriations (HCA), iwayatda ti pannakabista ti singasing a badiet iti las-ud ti dua a lawas, idinto a mangrugi ti debate iti plenario inton Septiembre 16.
Kinuna ni Quimbo nga inaldaw a tratarenda ti badiet ti tunggal ahensia agingga a malpas daytoy inton Septiembre 25.
Innayon pay ni Quimbo a dagiti diputado laeng ti mabalin a makidiskutir, ket saan a mapalubosan dagiti opisial ti ahensia gobierno a mangsungbat iti ania man a saludsod ti kameng ti Kamara. (Dexter Barro II/Manila Bulletin//Lito Hilidon/Bannawag)
