Manamnama a maiwarasen ti nasurok 100,000 a titulo ti daga kadagiti benepisiario ti agrarian reform sakbay nga agleppas ti tawen, kas kinuna ni Presidente Ferdinand Marcos Jr. (PBBM) itay Septiembre 12, 2024.
Mainayon dayta iti 136,000 a titulo ti daga a naipaayen kadagiti benepisiario iti entero a pagilian, segun iti kaudian a datos ti Department of Agrarian Reform (DAR).
Indauluan ni PBBM ti pannakayawat dagiti 343 a Certificate of Land Ownership Award (CLOA) kadagiti Agrarian Reform Beneficiaries (ARB) a naangay iti Quezon City itay Septiembre 12.
Buklen ti 232.76-ektaria ti CLOA a naipaay kadagiti 287 nga ARB manipud iti Nasugbu, Batangas (Region IV-A).
Pakaisukatan ti Doliar iti Pisos iti Nobiembre 25, 2024
Segun iti DAR, agdagup ti 136,116 a CLOA ti naiwaras kadagiti 138,718 nga ARB iti entero a pagilian. Adda pay 101,666 a titulo a maiwaras kadagiti natda a bulan daytoy a tawen.
Malaksid iti daytoy, inyawat pay ni PBBM ti 1,119 a Certificates of Condonation and Release of Mortgage (COCROM), a mangsakup iti 1,728.349 nga ektaria ti daga kadagiti 1,000 a benipisiario.
Pinakawan ti gobierno ti PhP274.9 a milion nga utang dagiti ARB iti nadumaduma nga ili ti Bulacan.
Adda pay 300,000 a COCROM a manamnama a maiwaras sakbay nga agleppas daytoy a tawen. (Betheena Unite/Manila Bulletin//Lito Hilidon/Bannawag)
