Impakaammo ni Presidente Marcos Jr. idi Biernes, Septiembre 13, nga iti dayta nga aldaw, ibaklay ti gobierno dagiti bayadan dagiti pasiente nga adda iti Level 3 public hospital iti pagilian kas paset ti pannakarambak ti maika-67 a panagkasangayna.

Inwaragawagna daytoy kalpasan ti pannakalukat ti “Agri-Puhunan at Pantawid Program,” maysa a pasilidad a pagutangan para kadagiti mannalon iti Nueva Ecija, ken iti panangidaulona iti pannakaibunong dagiti Certificate of Condonation Release of Mortgage (CoCRoM) kadagiti  Agrarian Reform Beneficiaries (ARBs) iti Central Luzon.

Iti interbiu kalpasan ti pannakalukat ti nasao a pasilidad, nadakamat ni Marcos nga arapaapna nga agsaknap daytoy a programa kadagiti dadduma pay a paset ti pagilian tapno makatulong kadagiti mannalon a mangpaadda iti kuarta a kasapulanda nga agtalon.

Tapno makatulong met kadagiti agrarian reform beneficiary iti Central Luzon, nagibunong ti presidente kadagiti Certificate of Condonation with Release of Mortgage (CoCRoM).

PBBM, dumar-ay iti ASEAN Summit iti Laos

Idi Hulio 2023, pinirmaan ni Marcos ti New Agrarian Reform Emancipation Act (NAEA) a mangapakawan iti amin nga utang, agraman interes, multa ken surcharge dagiti ARB manipud iti daga a naipaay kadakuada babaen ti Presidential Decree (PD) 27, RA No. 6657, ken RA 9700. (Betheena Unite/Manila Bulletin//Lito Hilidon/Bannawag)