Suportaran ti Estados Unidos (US) ken European Union (EU) ti tarigagay ti Filipinas ken China a mangep-ep iti risiris iti West Philippine Sea (WPS), nupay impeksada a maseknanda unay iti agtultuloy a napeggad nga aramid ti China iti laksid dagitoy nga addang.
Idi Septiembre 11, nagsarita ti Filipinas ken China maipanggep iti pannnakataming dagiti di panagkikinnaawatan bayat a kumarkaro manen ti tension iti baybay ti Escoda Shoal.
Dinakamat da Secretary ti US State Department Deputy Kurt Campbell ken Secretary General ti European External Action Service (EEAS) Stefano Sannino ti deklarasion dagiti Group of Seven Leaders idi Hunio 14 nga awan ti legal a pagbatayan ti China iti panangtagikuana iti entero a South China Sea.
Impaganetgetda pay a ti Arbitral Tribunal award idi 2016 ket nainkalintegan ken adda legal nga epektona kadagiti amin a maseknan, ken agbalin a pagbatayan iti natalna a pannakarisut dagiti di panagkikinnaawatan dagiti maseknan a partido. (Joseph Pedrajas/Manila Bulletin//Lito Hilidon/Bannawag)
