Dua a ganggannaet a puga a wanted kadagiti bukodda a pagilian ti naarestar segun iti pakaammo nga inruar ti Bureau of Immigration (BI).
Binigbig ti BI dagitoy a da Zhang Xi, maysa nga Intsik, ken Wu Hsih Hsu, maysa a Taiwanese. Maipupok dagitoy iti pasilidad ti BI sadiay Taguig City bayat a maur-uray ti pannakaideportarda.
Kinuna ti BI a ni Zhang ket inarestar dagiti operatiba ti Fugitive Search Unit (BI-FSU) ti bureau idi Septiembre 8 iti Diosdado Macapagal Boulevard iti Paranaque City.
Wanted ni Zhang iti China ken Interpol (International Criminal Police Organization).
Blazers, inatiwda ti Red Lions; kasangoda ti Cardinals iti NCAA finals
Segun iti pakaammo, dua a warrant of arrest kontra kenkuana ti inruar ti Cyber Police Branch ti Daqing Municipal Public Security Bureau idi 2023 gapu iti “Illegal Control of Computer Information Systems in Violation of Article 285 ti China’s Criminal Law.”
Mapapati nga isu ti mangidadaulo iti maysa nga online criminal group a nangdisenio iti computer virus a makagun-od iti personal nga impormasion dagiti biktimada a mausar kadagiti aktibidadda a mainaig iti panangallilaw.
Kinuna ti BI a naarestar met ni Wu idi Septiembre 5 iti head office ti BI idiay Intramuros, Manila.
Namarkaan ni Wu kas undesirable alien kalpasan a nakaawat ti BI iti impormasion manipud iti Taipei Economic and Cultural Office (TECO) iti Filipinas nga adda warrant of arrest kontra kenkuana gapu iti kaso a panagrames a naipila iti korte ti Taiwan idi 2005. Naduktalan pay nga overstaying ni Wu iti Filipinas iti nasurok a 20 a tawen, segun met laeng iti pakaammo. (MANILA BULLETIN)
