Naisaad iti Tropical Cyclone Wind Signal No. 1 ti 19 a lugar iti Luzon itoy nga aldaw, Lunes, Septiembre 16, bayat ti pannakapadpadaan ti panag-landfall ti Tropical Depression “Gener” iti Isabela wenno Aurora iti uneg ti 24 nga oras, kas kuna ti Philippine Atmospheric, Geophysical and Astronomical Services Administration (PAGASA) iti kaudian nga advisory daytoy.
Agingga itay 11 a.m., naibayog ti Signal No. 1 iti Cagayan, agraman ti Babuyan Islands, Isabela, Quirino, Nueva Vizcaya, Apayao, Kalinga, Abra, Ifugao, Mountain Province, Benguet, Ilocos Norte, Ilocos Sur, La Union, Pangasinan, Zambales, Tarlac, Nueva Ecija, Aurora, ken ti amianan a paset ti Quezon, agraman ti Polillo Islands.
Imballaag ti PAGASA ti idadateng ti napigsa a tudo iti sumagmamano a paset ti Luzon, ken uray pay iti Visayas, gapu iti agtipon nga epekto ti Tropical Depression Gener ken ti tudo nga idateng ti abagat.
Agingga iti tengnga ti aldaw ti Septiembre 17, Martes, posible ti napigsa a tudo iti Palawan, Occidental Mindoro, Aklan, Antique, Negros Occidental, Cagayan, Isabela, Quirino, ken Aurora.
COC ni Doc Willie Ong a para senador, impila ti asawana
Mabalin met nga agsagaba iti gagangay agingga iti napigsa a tudo ti Oriental Mindoro, Marinduque, Romblon, dadduma a paset ti Western Visayas, dadduma a paset ti Negros Island Region (NIR), Quezon, Camarines Norte, Camarines Sur, dadduma a paset ti Cagayan Valley, dadduma a paset ti Cordillera Administrative Region (CAR), Ilocos Norte, Nueva Ecija, ken Bulacan.
Manipud iti tengnga ti aldaw ti Septiembre 17, Martes agingga iti Mierkoles, Sept. 18, mabalin met nga agsagaba iti napigsa agingga iti nakaro ti kinapigsana a tudo ti Palawan, Occidental Mindoro, Aklan, Antique, Negros Occidental, Cagayan, Isabela, Apayao, Mountain Province, Kalinga, Ifugao, Aurora, ken Polillo Islands.
Iti sabali a bangir, sipsiputan ti PAGASA ti bagyo iti ruar ti pagilian nga addaan iti internasional a nagan a “Pulasan.” Iti kanito a sumrek iti Philippine Area of Responsibility inton Martes, Sept. 17, maikkan iti nagan a “Helen.” (ELLALYN DE VERA-RUIZ/ MANILA BULLETIN)
