Impaganetget ni Secretary ti Department of Health (DOH) Teodoro Herbosa nga awan pay ti inaprobaran ti Food and Drug Administration (FDA) nga ania man a bakuna kontra iti mpox iti Filipinas.
Inlawlawag daytoy ni Sec. Herbosa kalpasan a matakuatanda ti maysa a kompania nga agkunkuna a nabakunaan amin nga empleadona kontra iti mpox, kas naipaskil iti social media.
Segun ken ni Herbosa, no pudno a nakaala iti bakuna kontra iti mpox ti nadakamat a kompania, saan a rehistrado iti FDA daydiay a bakuna.
Panggep ni Herbosa ti agpatulong iti Department of Justice (DOJ) ken iti National Bureau of Investigation (NBI) tapno maidarum ti nadakamat a kompania gapu iti panangitandudona iti panagusar iti ilegal a bakuna. (Merlina Hernando-Malipot/Manila Bulletin//Lito Hilidon/Bannawag)
