Kalpasan ti lima a bulan a pannakai-deploy-na iti West Philippine Sea (WPS), pimmanawen idi Septiembre 14, 2024 ti barko a BRP Teresa Magbanua (MRRV-9701) iti nagpunduan daytoy paset ti Escoda Shoal.
Segun ken ni Commodore Jay Tarriela, pannakangiwat ti Philippine Coast Guard, kasapulan nga agsubli ti flagship ti PCG iti puerto gapu iti panagdakes ti panawen, pannakaibus dagiti suplay, ken ti pannakaibakuit dagiti masakit a personnel. Kasta met a masapul a matarimaan ti istruktural a dadael ti nasao a barko a ginubuay ti China Coast Guard idi Agosto 31, 2024.
Ipetpetteng met ti China a saan a maikanatad ti kaadda ti BRP Teresa Magbanua iti ibagbaga daytoy a teritoriona iti WPS kas panangiganetgetna iti dina panangikabilangan iti pangngeddeng ti 2016 Arbitral Tribunal a nangpabor iti Filipinas ken nangilaksid iti "nine-dash line" nga ipilpilit ti China a kasaknap ti masakupanna. (MANILA BULLETIN)
