Nakaro a bisin ken pannakawaw ti sinagrap dagiti tripulante ti BRP Teresa Magbanua (MRRV-9701) gapu iti ilegal a panangbangen dagiti puersa ti China kadagiti nangiwayat iti resupply mission iti Escoda Shoal idi napan a bulan.
Daytoy ti imbutaktak ti Philippine Coast Guard (PCG) itay Septiembre 16, 2024, ket kinunada nga isu ti kangrunaan a makaigapu iti panagsanud ti BRP Teresa Magbanua iti Escoda Shoal, iti laksid ti gagarda a bantayan daytoy.
Segun iti PCG, nabaelanda pay ti nangiwayat iti resupply mission manipud idi Abril agingga iti Hulio. Ngem idi Agosto 26, didan nabaelan ti mangted iti suplay iti BRP Teresa Magbanua ta binangenan ida dagiti barko ti China Coast Guard (CCG) ken People’s Liberation Army-Navy (PLA-N), ket isun ti nangrugian iti parikutda a suplay ti makan ken danum.
Segun ken ni pannakangiwat ti PCG Commodore Jay Tarriela, lugaw laeng ti ipapauneg dagiti tripulante iti las-ud ti tallo a lawas.
Pakaisukatan ti Doliar iti Pisos iti Nobiembre 25, 2024
Nupay adda desalination machine ti BRP Teresa Magbanua, nagbalin latta a parikut ti danum ta gapu iti napaut a pannakausar daytoy, saanen a makaparnuay iti mainum a danum. Gapu iti daytoy, danum ti tudo laengen ti in-inumenda, ket no awan ti tudo, agalada iti danum manipud iti tedted ti aircondition sa ipaburekda.
Malaksid iti bisin ken waw, nasken a sumanglad ti BRP Teresa Magbanua gapu iti nadawel a panawen iti Palawan, ken tapno maipatarimaan dagiti nadadael a gapuanan ti panangdungpar dagiti barko ti CCG.
Impaganetget ni Tarriela a saan a pagtallikudan ti PCG wenno ti Armed Forces of the Philippines (AFP) ti kalintegan ti Filipinas iti West Philippine Sea, ket mangibaonda iti sabali a barko ti PCG iti Escoda Shoal. (Martin Sadongdong/Manila Bulletin//Lito Hilidon/Bannawag)
