Pinalubosan ti Valenzuela City Regional Trial Court (RTC) ni dati a Mayor ti Bamban, Tarlac Alice Guo a dumar-ay iti pannakaituloy ti imbestigasion ti Committee on Women, Children, Family Relations and Gender Equality ti Senado mainaig kadagiti ilegal nga aramid ti Philippine Offshore Gaming Operators (POGO), a naituding ita nga aldaw, Septiembre 17, 2024.
Iti pammilin nga impaulog ni Valenzuela City RTC Branch No. 282 Presiding Judge Elena Amigo-Amano itay Septiembre 16, naibilin iti Philippine National Police (PNP) Custodial Facility nga ituldoda ni Guo iti Senado ket ipaayda ti naiget a seguridad daytoy.
Pinatgan ti Valenzuela RTC ti kiddaw ni Senador Risa Hontiveros a sumango koma ni Guo iti imbestigasion ti Senado, kas panangraem iti karbengan ti Senado a mangiwayat iti investigation in aid of legislation. (Hannah L. Torregoza/Manila Bulletin//Lito Hilidon/Bannawag)
