Indarum ti National Bureau of Investigation (NBI) iti kaso a human trafficking ti maysa nga ama iti Quezon City kalpasan ti pannakatiliwna iti akto a panangilakona iti 11-a-bulan nga anakna a maladaga iti PhP55,000.
Naipila ti kaso iti Quezon City Prosecutor's Office kontra ken ni Kenneth Crisologo a naarestar idi Septiembre 3 bayat ti entrapment operation nga inwayat ti Special Task Force ti NBI (NBI-STF).
Nangrugi ti amin manipud iti impormasion a naaawat ti NBI-STF a daytoy a Crisologo, ilaklakona online ti bukodna nga anak.
Nagpammarang dagiti operatiba ti NBI-STF nga interesado a manggatang iti maladaga ket kinontakda ni Crisologo a nagkuna met a pudno nga ilaklakona ti anakna iti PhP55,000.
Australiano, 2 pay, natiliw gapu iti bogus a doliar
Gapu iti daytoy, nangiwayat ti NBI-STF iti entrapment, kas pammilin ni NBI Director Jaime B. Santiago.
Naiwayat ti entrapment operation iti Brgy. Pag-asa, Quezon City a nakatiliwan ni Crisologo. Kalpasan ti pannakatiliwna, naipaima met ti maladaga iti Social Services Development Department. (Jeffrey Damicog/ Manila Bulletin// Cles B. Rambaud/Bannawag)
