Kaaduan kadagiti baboy iti Batangas a natudokan iti bakuna a pangkontra iti African Swine Fever (ASF) ti nakapataud iti antibodies 14 nga aldaw kalpasan ti pannakabakunada, segun iti Department of Agriculture (DA).
Kinuna ni DA Assistant Secretary for Swine and Poultry Constante Palabrica, a maysa a beterinario, a 60 a porsiento dagiti binakunaanda a baboy ti nakapataud iti antibodies. Innayonna a kalpasan ti 14 manen nga aldaw, kitaenda no ngumato pay ti nasao a percentage. Inlawlawagna a gagangay a maladladaw ti pannakapataud ti antibodies iti dadduma a baboy.
Ingganetget met ni Palabrica iti publiko a di koma patpatien a dagus dagiti palso a report a maiwarwaras iti social media nga innem a baboy iti Batangas ti natay gapu iti ASF vaccine.
Segun ken ni Assistant Secretary Arnel De Mesa, spokesperson ti DA, maysa kadagiti innem a baboy ti lugpi idinto a dagiti lima pay ket addan iti pulmonary ailments a saan a naibagbaga kasakbayan ti pannakabakuna dagitoy.
Australiano, 2 pay, natiliw gapu iti bogus a doliar
Rinugian ti DA ti agbakuna kadagiti baboy iti Lobo, Batangas idi Agosto 30. Nailatang ti 10,000 a dosis ti ASF vaccine iti probinsia ti Batangas gapu iti panagraira ti ASF. Segun pay iti datos ti DA, mapan a 7,900 a baboy ti napapatay (culled) idi Septiembre 6 iti Batangas gapu iti ASF. Naammuan nga agraraira ti ASF iti 96 a barangay iti Batangas.
Tapno malapdan ti panagwaras ti ASF, nangilatang ti gobierno nasional iti PhP300-milion tapno maigatang iti 600,000 a dosis ti ASF vaccine manipud iti Vietnam. (Jel Santos, MANILA BULLETIN/Roy V. Aragon, BANNAWAG)
