Isagsaganan ti Philippine National Police (PNP) ti pannakaipila ti kaso nga "inciting to sedition" maibusor kadagiti pasurot ni daulo ti Kingdom of Jesus Christ (KOJC) Apollo Quiboloy.
Iti maysa nga interbiu itay Septiembre 16, 2024, kinuna ni Director ti Police Regional Office-Davao Region (PRO-11) Brig. Gen. Nicolas Torre III nga idarumda iti kaso a sedision dagiti nangiwayat iti welga idi nangrugi ti panangsawar ti PNP ken ni Quiboloy idi uneg ti solar ti KOJC.
Binangenan dagiti pasurot ni Quiboloy ti national highway iti sango ti 30-ektaria a solar ket nangaramatda pay iti backhoe idi nagwelgada idi rabii ti Agosto 25.
Kinuna ni Torre nga ipilada ti kaso inton makasubli iti Davao City, kalpasan ti idadar-ayna iti pannakabista ti badiet ti PNP iti Kamara. (Christopher Lloyd Caliwan/PNA//Lito Hilidon/Bannawag)
