Palutpoten ti Philippine Amusement and Gaming Corporation (PAGCOR) ti impormasion a maysa a dati a hepe ti Philippine National Police (PNP) ti nangtulong ken ni Alice Guo a makapanaw iti Filipinas bayat a maar-aramid ti imbestigasion ti Senado iti ilegal a Philippine Offshore Gaming Operators (POGO).
Malaksid iti daytoy, kinuna ni senior vice president ken daulo ti security and monitoring cluster ti PAGCOR a ni Retired Gen. Raul Villanueva a kayatda pay a patalgedan ti impormasion a pinasuksokan ni Guo ti maysa nga opisial ti Bureau of Immigration (BI) iti PhP200 a milion tapno makalibas daytoy iti pagilian.
Innayon ni Villanueva a kitkitaenda met ti posibilidad a pinasuksokan pay ni Guo dagiti dadduma nga opisial ti gobierno, agraman ti dati a hepe ti PNP.
Kinuna met ni Police Brig. Gen. Raul Tacaca, Deputy Director for Administration ti PNP-Criminal Investigation and Detection Group (CIDG), a madama ti panangberipikarda iti impormasion mainaig kadagiti agdama ken dati nga opisial ti PNP a nairaman iti ilegal nga operasion ti POGO. (Hannah Torregoza/Manila Bulletin//Lito Hilidon/Bannawag)
