Pampanunoten ti Korte Suprema ti panagaramatna iti artificial intelligence (AI) a kas katulongan iti panagsurat iti desision.
Kinuna ni Villanueva a mabalin a maaramat dagiti datos manipud iti AI iti pannakai-draft dagiti desision, kas sungbatna iti saludsod ni Sen. Grace Poe, chairperson ti subcommittee. Innayon ni Villanueva a rugrugian metten ti SC ti mangdebelop iti ”voice to text” transcription.
Impakaammo daytoy ni SC Court Administrator Raul Villanueva bayat ti hearing ti Senate Finance Subcommittee maipanggep iti singasing a P63.57-bilion a badiet ti hudikatura iti 2025.
Babaen daytoy, kinuna ni Villanueva a bayat ti pannakaited ti maysa a testimonia, mairekord ken maisurat metten. Mangnamnamada pay a dagiti testimonia a maisao iti maysa a lengguahe, maipatarus a dagus iti sabali a lengguahe, kas koma ti Ilokano, maipatarus a dagus iti Ingles.
COC ni Doc Willie Ong a para senador, impila ti asawana
Impalagip ketdi ni Poe a saan koma nga agpannuray ti SC iti AI tapno dagiti masurat a desision, isarmingna met laeng ti rikna ken panunot ti tao, banag a sinarurongan ni SC Associate Justice Mario Lopez a nagkuna nga ipasigurado ti SC a saan nga agpannuray iti AI iti pannakaileppas dagiti kaso ta iti pannakadesision dagitoy, mairamen latta ti “panangngaasi ken pannakaawat” wenno rikna nga awan iti AI.
Kinuna ni Lopez a kinapudnona, adda dagiti desision a di rumbeng nga ipaiggem iti AI ta dagiti korte, saanda laeng met a korte ti linteg.
Innayonna nga epektibo ketdi ti AI iti panang-monitor kadagiti kaso tapno maliklikan ti pannaturog dagiti kaso. (Hannah L. Torregoza/ Manila Bulletin// Cles B. Rambaud/Bannawag)
