Impalgak ti National Disaster Risk Reduction and Management Council (NDRRMC) itay Septiembre 19, 2024 a 20 a katao ti natay, ken 14 ti mapukpukaw gapu iti dawel ti tiempo a sinagrap ti pagilian sipud idi napan a lawas.
Segun iti datos ti NDRRMC, adda pay 10 a baro a natay gapu iti nagtitipon nga epekto ti Bagyo Ferdie ken Gener, ken ti napapigsa nga abagat -- siam iti Mimaropa ken maysa iti Central Visayas (Region 7).
Itay kallabes, nailanad ti NDRRMC ti 10 a natay gapu iti Bagyo Ferdie ken abagat: uppat iti Western Visayas (Region 6) ken Bangsamoro Autonomous Region in Muslim Mindanao (BARMM), ken dua iti Zamboanga Peninsula (Region 9).
Ngem kinuna ti Office of Civil Defense (OCD) a beripikarenda pay ti nailanad a bilang dagiti natay.
Ilalaka ti presio dagiti serbisio ken magatgatang, bimmaba iti 1.9% idi Septiembre
Adda met 14 a mapukpukaw gapu iti panangbegbeg ti bayakabak iti Luzon ken iti nadumaduma a paset ti Visayas ken Mindanao.
Addan 156,524 a pamilia ti naapektaran ti dua a bagyo ken ti abagat, a buklen ti 256,593 a katao segun iti NDRRMC agingga idi Septiembre 11. (Martin Sadongdong/Manila Bulletin//Lito Hilidon/Bannawag)
