Ni daulo ti National Commission for Culture and Arts (NCCA) Victorino M. Manalo (maikadua, agpakanigid) ken dagiti dadduma pay nga opisial ti NCCA a da (agpakanawan): Arwin Paul A. Lingat (Head, Northern Cultural Communities); Reden S. Ulo (Commissioner, SCCTA); ken Pablito C. Gonzales (Head, Central Cultural Communities) iti naangay a press conference sadiay Intramuros, Manila itay Septiembre 18, 2024.

Panangpatibker iti balligi ken gapuanan dagiti Indigenous People (IP) ti sagudayen ti Dayaw 2024 a maangay sadiay Lake Sebu iti South Cotabato manipud Oktubre 3 agingga 5, 2024 nga addaan iti tema a "Katutubong Filipino: Pagtibayin ang Tagumpay 2030" (Indigenous Filipinos Strengthening the Success by 2030).

Idauluan ti Subcommission on Cultural Communities and Traditional Arts (SCCTA), babaen ti pannakitinnulong ti Klowil Kem Ong, Inc., ti pannakaisayangkat ti Dayaw 2024, kas panangrambak iti National Indigenous People's Month, a naituding a maangay iti bulan ti Oktubre kas sagudayen ti Presidential Proclamation 1906.

Panggep ti Dayaw 2024 a maiparang dagiti kannawidan ti agarup 270 a tribu iti Filipinas babaen ti panagsala, panagaruat, ken dadduma pay a wagas tapno naan-anay ti pannakabigbig ken pannakasalaknib iti kalinteganda kas Indigenous Cultural Community (ICC).

Ti SCCTA ket paset ti National Commission for Culture and Arts (NCCA) nga idadauluan ni Victorino M. Manalo.

Nasional

Ilalaka ti presio dagiti serbisio ken magatgatang, bimmaba iti 1.9% idi Septiembre

(Lito Hilidon/Bannawag)