Kas panangbigbig kadagiti parikut iti pannakaipatungpal ti narebisar a kurikulum manipud iti Kindergarten agingga Grado 10 ita a tawen, inruar ti Department of Education (DepEd) ti napabaro a pagalagadan kadagiti eskuela itay Septiembre 18, 2024.
Iti kallabes, kiniddaw ti grupo dagiti mannursuro a masuspende koma ti MATATAG Curriculum, gapu ta nanayonan ti trabahoda, ken dadduma pay a parikut.
Maibatay iti impaulog ni Secretary ti DepEd Sonny Angara a DepEd Order No. 12, Series of 2024, a nangamendar iti DepEd Order No. 010, Series of 2024, maikkan iti wayawaya dagiti eskuela a mangipatungpal iti MATATAG Curriculum maibatay iti kita wenno kadakkel ti eskuela, maidiaya a programa ti kurikulum, ken ti kaadda ti mangisuro ken siled-pagadalan. Ngem nasken nga aprobaran ti Schools Division Offices (SDO) dagiti maiwayat a programa.
Kinuna pay ti DepEd nga agtultuloy ti pannakaaramat ti bukod a pagsasao (Mother Tongue) iti panangisuro ken panagadal ngem saan a maidiaya a kas maysa nga asignatura (subject). (Merlina Hernando-Malipot/Manila Bulletin//Lito Hilidon/Bannawag)
