Isingasing ni Diputado ti Camarines Sur 2nd District LRay Villafuerte ti dakdakkel a badiet ti Department of Health (DOH) para iti 2025 tapno masinunuo ti pannakaipatakder ti ad-adu pay a "super health center" iti entero a pagilian.
Maibatay iti 2025 National Expenditure Program (NEP), PhP297.6 a bilion ti nailatang a pondo ti DOH, basbassit ngem iti agdama (2024) a pondona a PhP308.3-bilion.
Kinuna ni Villafuerte itay Septiembre 19, 2024, a kasapulan ti DOH ti dakdakkel a pondo tapno maituloy ti programa ti ahensia a mangipatakder iti super health centers kadagiti gobierno lokal.
Ti super health center ket ti napimpintas a bersion ti gagangay a Rural Health Units (RHU) ken kalalainganna laeng a bersion ti polyclinic, a kasapulan tapno makissayan ti tao kadagiti ospital. (Dexter Barro II/Manila Bulletin//Lito Hilidon/Bannawag)
