Indauluan ni Presidente Ferdinand R. Marcos Jr. ita a Biernes, Septiembre 20, ti pannakai-turnover ti 28 a Bagong Pilipinas Mobile Clinic iti Port Area, Manila, a maiwaras kadagiti nadumaduma a local government unit (LGU) iti Mindanao.
Iti bitlana, impaganetget ni Marcos a ti pannakataripato ti salun-at dagiti Filipino ket rumbeng a mabigbig a kas maysa a karbengan a saan ket a maysa a pribilehio. Kiniddawna kadagiti LGU a suportaran dagitoy ti pannakaipatungpal ti Bagong Pilipinas Mobile Clinics ti administrasionna.
"Babaen dagitoy a serbisio, maikkantayo iti gundaway a maliklikan, wenno masigud a mataming, dagiti sakit a kas iti sarut, diabetes, sakit iti bekkel, ken dadduma pay,” kinunana.
"Ngem uray kasano kapintas ken kamorderno dagiti ramittayo iti uneg ti mobile clinic, awan serserbina no saan met a mausar daytoy dagiti kailiantayo. Ditoy a kasapulantayo ti panagsuportar ken serbisio dagiti lokal a gobierno,” innayonna.
Australiano, 2 pay, natiliw gapu iti bogus a doliar
Kinuna ni Marcos nga agpaay dagiti LGU a kas rangtay a mamagkonektar kadagiti umili ken ti gobierno nasional para iti panagballigi ti Bagong Pilipinas Mobile Clinics iti pannakaipaay ti “serbisio a medikal, dignidad, panagtalek, ken namnama" kadagiti Filipino, nangruna kadagiti agnanaed iti nasulinek a luglugar.
Karaman kadagiti 28 nga LGU a nakaawat kadagiti mobile clinic ti Zamboanga del Norte, Zamboanga del Sur, Zamboanga Sibugay, Bukidnon, Camiguin, Lanao del Norte, Misamis Occidental, Misamis Oriental, Lanao del Norte, Davao de Oro, Davao del Norte, Davao del Sur, Davao Occidental, Davao Oriental, North Cotabato, Sarangani, South Cotabato, Sultan Kudarat, Agusan del Norte, Agusan del Sur, Dinagat Islands, Surigao del Norte, Surigao del Sur, Basilan, Lanao del Sur, Maguindanao del Norte, Maguindanao del Sur, Sulu, ken Tawi-Tawi. (Argyll Cyrus Geducos/MANILA BULLETIN)
