Naabsuelto ni negosiante a Janet Lim Napoles iti kasona a malversation mainaig iti PhP5 a milion a Priority Development Assistance Fund (PDAF).
Iti nasao met laeng a kaso, naabsuelto met ti dua a dati nga opisial ti National Livelihood Development Corporation (NLDC) a da Gondelina G. Amata (dati a pangulo) ken Gregoria G. Buenaventura (dati a division chief III) itay Septiembre 18, 2024.
Naidarumda gapu iti pannakairamanda iti PhP5 a milion a PDAF ni dati a Diputado ti La Union Victor Francisco C. Ortega a winaswasen ti Office of the Ombudsman (OMB).
Segun iti 98-panid a pangngeddeng ti Sandiganbayan, awan ti dokumento a mangipaneknek a nagnumar da Amata ken Buenaventura iti nadakamat a transaksion.
Pakaisukatan ti Doliar iti Pisos iti Nobiembre 25, 2024
Kinuna ti Sandiganbayan a gapu iti pannakaabsuelto da Amata ken Buenaventura, awan ti mabalin a pakikomplotan ni Napoles, kas pribado a tao, a nangitunda iti pannakaabsuelto daytoy.
Nupay kasta, sibabalud latta ni Napoles iti Correctional Institution for Women (CIW) gapu iti basolna iti plunder a mainaig met laeng iti PDAF. (Czarina Nicole Ong Ki/Manila Bulletin//Lito Hilidon/Bannawag)
