Impaganetget ni Presidente Ferdinand Marcos Jr. (PBBM) ti natibker a politikal ken diplomatiko a singgalut ti Filipinas ken Indonesia kabayatan ti panangpasangbayna ken ni President-elect ti Indonesia Prabowo Subianto iti Malakanyang itay Septiembre 20, 2024.
Ni Subianto ti baro a nabotosan a Presidente ti Indonesia ken mangrugi nga agakem inton Oktubre 20.
Kinuna ni PBBM a ti isasarungkar ti daulo ti Indonesia ti mangipakita iti natibker ken nauneg a relasion ti dua a pagilian iti las-ud ti 75 a tawenen inton Nobiembre.
Kinuna ni Subianto a gandatna a patibkeren ti nasinged a panaggayyem ti Filipinas ken Indonesia, ta adda agpada a ramut, kannawidan, ken pakasaritaanda, malaksid iti asideg a panagkaarrubada. (Betheena Unite/Manila Bulletin//Lito Hilidon/Bannawag)
