Pinalubosan ti Pasig City Regional Trial Court (RTC) nga agtalinaed ni Alice Guo iti sidong ti Philippine National Police (PNP) iti Camp Crame iti Quezon City ita, Septiembre 23, 2024.
Impaulog ni Pasig City RTC Judge Annielyn B. Medes-Cabelis ti pammilin a mangitantan iti pannakayakar ni Guo iti Pasig City Jail bayat a resolbaren ti korte ti motion for reconsideration (MFR) nga impila ti abogado ni Guo.
Imbilin ti hues iti PNP a yegda ni Guo iti pannakabista ti MFR inton Septiembre 27 tapno palutpotenda no agpayso nga adda pangta iti biag ni Guo ken no natalged met laeng iti Pasig City Jail Female Dormitory a pakaipupokanna koma.
Naidarum ni Guo iti kaso a panaglabsing iti Republic Act (RA) 9208, wenno ti Anti-Trafficking in Persons Act of 2003, mainaig iti ar-aramid ti Zun Yuan Technology Center, maysa a Philippine Offshore Gaming Operator (POGO) iti Bamban, Tarlac a rinaut dagiti autoridad. (Jeffrey Damicog/Manila Bulletin//Lito Hilidon/Bannawag)
