Inton eleksion iti Mayo 12, 2025, padasen ni Luis ”Chavit” Singson ti gasatna iti Senado a kas independiente a kandidato.
“I no longer have (political) enemies. Pag away nang away walang magyayari,” kinuna ni Singson iti daytoy nga aldaw, Lunes, Sept. 23, nga isasarungkarna iti opisina ti Manila Bulletin (MB) iti Intramuros, Manila.
Iti daytoy panagkandidatona a senador, mangnamnama ni Singson iti suporta a kunana nga inkari dagiti dua a kangatuan a lider ti pagilian, da Presidente Ferdinand R. Marcos Jr. ken Vice President Sara Duterte.
Iti pannakaibaga kenkuana iti agparparang nga in-inut a panagsina ti dalan da Marcos ken Duterte, dagus a kinunana: “I hope to be the peacemaker. I hope I could be the go-between.”
Australiano, 2 pay, natiliw gapu iti bogus a doliar
Mangnamnama pay iti suporta dagiti ehekutibo lokal ti pagilian, kas President Emeritus of the League of Municipalities of the Philippines (LMP).
Malaksid iti dayta, manamnamana pay ti industria ti transportasion. Yalnagna iti mabiit ti maysa nga electric-vehicle (EV) company iti pannakikadua ti maysa a Korean company, nga agpartuat iti 28-seater EV a maidiaya iti sektor ti public transport iti sistema a “no down payment, no interest” ken iti kagudua ti regular a presio daytoy iti merkado.
Dagitoy nga EV, a pakairamanan dagiti motorsiklo ken traysikel, kunana a mabalin a makabiaheda iti 100 a kilometro per charge, ken mayinstolarto dagiti solar charger para iti re-charging dagitoy.
Naragsakan met ni Singson a nangipadamag iti adu a nagapuananna a kas mayor ti Narvacan, Ilocos Sur manipud iti 2019 agingga idi 2022. Maysa kadagitoy ti pannakaited kadagiti umili ti Narvacan Card – maysa a multi-purpose ID debit card, a mangited iti gundaway kadagiti umili a maaddaan iti digital bank account ken mang-access kadagiti adu a serbisio ti gobierno lokal.
Kas senador, panggep ni Singson ti pannakapaadda ti alternatibo a banko kadagiti gobierno lokal.
“Mabalin a mausar daytoy dagiti OFW (overseas Filipino workers), kas sukat dagiti agdama a wagas ti fund transfer. Awan ti middlemen a mangiggem iti kuartada. Adda transparency ken napintas daytoy iti ekonomia,” inlawlawagna.
“Ti digitalization ti sibubukel a pagilian, dayta ti maysa kadagiti arapaapko nga ipatungpal bayat ti kaaddak iti Senado,” kinuna ‘toy agtawen iti 83 a beterano a politiko. (Rocky Nazareno/ Manila Bulletin// Cles Rambaud/ Bannawag)
