Ikagumaanan ti Kamara ti pannakaanamong iti PhP6.352 a trilion a 2025 General Appropriations Bill (GAB) iti maikatlo ken maudi pannakaibasana inton Septiembre 25, 2024, kalpasan ti dua lawas a debate.
Kinuna ni Speaker Martin Romualdez itay Septiembre 22 nga agtalinaedda iti naituding iti kalendario ti Kamara tapno nadaras a maaprobaran ti GAB, ngem di maisakripisio ti "kinasin-aw" daytoy.
Maysa a kangrunaan a gandat ti Kamara iti panagtultuloy ti debate ita, Septiembre 23, ket ti pannakatratar iti pondo ti Vice President (OVP) nga idauluan ni Bise-Presidente Sara Duterte.
Itay kallabes, insingasing ti Committee on Appropriation ti Kamara a makissayan ti pondo ti OVP ket agbalin laengen a PhP733 a milion daytoy. Ngem, kalpasan ti sesion iti plenario ita nga aldaw (Septiembre 23), malawlawagan dagiti diputado maipanggep iti singasing a pondo ti OVP. (Ellson Quismorio/Manila Bulletin//Lito Hilidon/Bannawag)
