Iti biang ni dati a sekretario ti Department of Agriculture (DA) Leonardo Montemayor, masapul nga agpalawag ni Secretary ti National Economic and Development Authority (NEDA) Arsenio Balisacan iti publiko no apay a di nabaelan ti Executive Order (EO) No. 62 a palakaen ti presio ti bagas iti merkado.
Ti NEDA ti nangilungalong iti EO No. 62 nga impaulog ni Presidente Marcos Jr. idi Hunio 20.
Segun ken ni Montemayor, rimmuaren iti merkado ti 96 a porsiento dagiti naangkat a bagas a simmangpet idi Septiembre 16, 2024.
Inkaritna pay a rumbeng a sarungkaran ni Balisacan dagiti tiendaan ken taltalon iti entero a pagilian tapno matarusanna ti agpayso a situasion -- ilalaka ti presio ti irik ken nangina latta ti presio ti bagas. (Jel Santos/Manila Bulletin//Lito Hilidon/Bannawag)
