Dua pay a fast attack interdiction craft-missile (FAIC-M) a bapor manipud iti Israel ti naideliber kas paset ti agtultuloy panangpabaro ti Philippine Navy (PN) iti armadana, impalgak ni Rear Admiral Renato P. David idi Lunes, Septiembre 23.

Segun ken ni Rear Adm. David, commander ti Philippine Fleet ti PN, nakadanon dagiti FAIC-M idi Septiembre 17 iti Pier 15 iti South Harbor, Manila.

Maikkanto dagiti dua a missile-capable patrol gunboat iti numero a "PG908" ken "PG909" ket dagitoy ti maikapito ken maikawalo a napaspas a bapor iti babaen ti Acero-class patrol vessels.

“Kas kadagiti immun-una ngem dagitoy, nairanta dagitoy kaideldeliber a bapor para kadagiti high-speed operation ken addaan dagitoy iti advanced missile systems ken sopistikado a teknolohia a mangnayon iti kapabilidad ti Philippine Navy a mangisayangkat kadagiti napartak ken epektibo a maritime interdiction operation,” kinuna ni David.

Lokal

Ruth Padilla, agngayangay a kas Diputado ti Nueva Vizcaya

Segun iti commander ti Philippine Fleet, ti isasangpet dagiti bapor ti mangipakita iti agtultuloy a modernisasion ti Navy.

Idi 2019, naaprobaran ti igagatang ti gobierno iti siam a fast craft kas paset ti narebisar a modernization program ti Armed Forces of the Philippines (AFP) ken naipaulog ti notice of award para iti P10-billion a proyekto idi 2021.

In Septiembre 2022, naideliber iti pagilian ti umuna a dua nga FAIC-M. Napanaganan dagitoy kas BRP Nestor Acero (PG901) ken BRP Lolinato To-ong (PG902)—agpada a naipanagan iti dua a kameng ti Philippine Marine Corps a nakagun-od iti kangatuan a pammadayaw iti pannakigubat, ti Medal of Valor.

Kalpasanna dimteng ti BRP Gener Tinangag (PG-903) ken BRP Domingo Deluana (PG-905) idi Abril 2023 ken nakomisionda a dagus iti serbisio iti sumuno a bulan.

Dimteng met ti maikalima ken maikanem nga FAIC-M, ti BRP Herminigildo Yurong (PG-906) ken BRP Laurence Narag (PG-907) idi Nobiembre 2023 ket nakomisionanda idi Mayo 22, 2024.

Ita, maysa laengen a fast boat ti saan a maideliber iti PN.

(Martin Sadongdong/Manila Bulletin// Juan A. Asuncion/Bannawag)