Aganay a 492 a tattao ti natay iti panangraut ti Israel iti Lebanon idi Lunes, Sept. 23, a nakairamanan ti nasurok a 90 a babbai ken ubbing, kas impakaammo dagiti autoridad ti Lebanon. Maibilang a kakaruan daytoy a napagteng iti nagbaetan ti gubat ti Israel ken ti grupo a Hezbollah sipud 2006.
Mainaig i'toy, pinakdaaran ti militar ti Israel dagiti umili iti abagatan ken daya ti Lebanon nga agbakwitdan kasakbayan ti lumawlawa a panagsaknap ti panagraut manipud tangatang (air strike) maibusor iti Hezbollah.
Rinibu a Lebanese ti pimmanawen iti abagatan ti Lebanon ket napusek kadagiti luglugan ti kangrunaan a highway a rummuar iti siudad ti Sidon ken agturong iti Beirut.
Segun iti health ministry ti Lebanon, kadagiti 492 a natay iti panangraut ti Israel, 35 nga ubbing ken 58 a babbai ti nairaman; nasugatan met ti 1,645 pay a tattao.
Sentro ti Beirut, binomba ti eroplano ti Israel iti umuna a gundaway
Kinuna ni Lebanese Health Minister Firass Abiad a kadagiti immun-una nga air strike ti Israel, natamaan dagiti ospital, medical centers, ken dagiti ambulansia. Sumagmamano met ti timmama kadagiti residensial a lugar iti abagatan ken daya a Bekaa Valley. Natamaan pay ti kabakiran a paset a nagagingga iti Byblos, a nasurok a 130 a kilometro manipud iti beddeng iti amianan ti Beirut.
Kinuna ti Israel nga ilawlawana pay dagiti air strike tapno mairaman dagiti lugar ti tanap iti akindaya a beddeng ti Lebanon iti Syria. Nabayagen ti kaadda ti Hezbollah iti nasao a tanap, a nakabangonan ti grupo idi 1982 babaen ti tulong ti Revolutionary Guards ti Iran.
Iti nairekord a mensahe ni Israeli Prime Minister Benjamin Netanyahu, indagadagna kadagiti sibilian a Lebanese nga ipangagda ti dawat ti Israel a panagbakwit.
“Pangngaasiyo ta lisianyo ti peggad,” kinuna ni Netanyahu. "Apaman a malpas ti operasionmi, makaawidkayo met laeng a sitatalged kadagiti pagtaenganyo,” innayonna.
Kinuna ti pannakangiwat ti militar ti Israel a ni Rear Admiral Daniel Hagari nga iwayat ti Israeli army ti “ania man a kasapulan a maaramid ” tapno mapapanaw ti Hezbollah manipud iti nagbeddengan ti Lebanon ken Israel.
Pattapattaen ti Israel nga addaan ti Hezbollah iti agarup 150,000 a rockets ken missiles, agraman dagiti guided missile ken long-range projectile a makabael a mangtiro iti sadino man a paset ti Israel.
Kinuna ni Hagari a nangipatayab ti Hezbollah iti agarup 9,000 a rockets ken drones iti Israel sipud idi Oktubre, agraman ti 250 idi Lunes laeng.
Segun iti Israeli military, kas balesna, pinuntiria dagiti eroplano a pakigubat ti Israel idi met laeng Lunes ti 1,600 a base ti missile ken rocket ti Hezbollah ket nadadael ti adu a cruise missiles, long- ken short-range rockets ken attack drones. Kinuna ni Hagari nga adu kadagitoy a base ti Hezbollah ti nailemmeng kadagiti residensial a lugar. Nangipakita pay ni Hagari kadagiti retrato ti kunana nga armas a nailemmeng kadagiti pribado a pagtaengan.
“Pinagbalinen ti Hezbollah ti abagatan a Lebanon a kas war zone,” kinuna ni Hagari.
Kinuna met ti Hezbollah a nangipabantoda iti dinosdosena a rocket iti Israel. Malaksid kadagiti base militar ti Isarel, pinuntiria pay ti Hezbollah dagiti pasilidad ti Rafael Defense Firm, a nakabase idiay Haifa.
Nangipatayab pay ti Hezbollah sipud idi Sept. 22 iti agarup 150 a rocket, missiles, ken drones iti amianan nga Israel kas panangibalesna kadagiti panangraut ti Israel a nakatayan ti maysa a nangato a commander ti Hezbollah ken pinulpullo a mannakigubatda.
Nanggubuay met iti panagamak a mabalin nga agtungpal iti naan-anay a gubat ti kumarkaro a panagbimbinnales ti Israel ken ti Hezbollah, kabayatan a makidangdangadang ti Israel iti Hamas iti Gaza.
Ingganetget ti Hezbollah nga itultuloyna ti pannakigubatna iti Israel kas pannakikaykaysana iti Hamas, a kapadana a militante a grupo a supsuportaran ti Iran. (Associated Press/MANILA BULLETIN)
