Adda dakes nga epekto ti nalabes a panagusar iti social media iti panagpababa ti kinaragsak dagiti agtutubo, nangruna kadagiti bumalasitang, iti pagilian nga Ingles ti lengguaheda ken iti Western Europe, segun iti World Happiness Report 2026 a naipablaak ita nga aldaw, Marso 19.
Natakuatan ti tinawen a report, nga impablaak ti Wellbeing Research Centre iti University of Oxford, a ti Finland ti karagsakan a pagilian iti sangalubongan iti naminsiam a daras, a sinaruno dagiti Nordic a pagilian kas iti Iceland, Denmark, Sweden, ken Norway a nairaman iti sangapulo a kararagsakan a pagilian.
Ngem impaganetget ti Wellbeing Research Centre no kasano a bimmaba unay ti panangmatmat iti biag dagiti agtawen iti nababbaba ngem 25 iti Estados Unidos, Canada, Australia, ken New Zealand iti napalabas a dekada, ken kunada a ti napaut nga oras a nabusbos iti panaguper iti social media ket kangrunaan a makagapu iti daytoy.
Segun iti report, ti natalged a ranggo ti Finland ken dadduma a pagilian iti Northern Europe ket gapuanan ti nagtitipon a kinabaknang, padapada a pannakaiwaras daytoy, kaadda ti naimbag nga estado a mangsalaknib kadagiti umili manipud kadagiti peggad ti panagbaba ti ekonomia, ken nasalun-at a panagbiag.
Kas iti napalpalabas a tawen, adda latta iti kababaan a ranggo dagiti pagilian a nariribuk wenno adda iti asideg ti nariribuk a lugar, kas iti Afghanistan, a sinaruno met ti Sierra Leone ken Malawi iti Africa.
Agtultuloy a pannakidangadang ti Iran, impakdaar ni Mojtaba Khamenei
Imparangarang ti report ti panagkanaig ti kasasaad ti salun-at iti nalabes a panagusar iti social media, nangruna kadagiti bumalasitang.
Segun iti sukisok, dagiti agtutubo nga agusar iti social media iti nababbaba ngem maysa ng oras ti addaan kasayaatan iti kasasaad ti biag.
Nupay kasta, napaliiw dagiti nagsukisok nga iti dadduma a paset ti lubong, kas iti Middle East ken South America, adda positibo nga epekto ti social media iti kasasaad ti biag dagiti agtutubo, uray napaut ti panagusarda iti social media.
Inlawlawag ti report a gapu daytoy iti nadumaduma a bambanag a saan nga agpapada iti tunggal kontinente, ngem kunada nga adda latta dakes nga epekto ti nalabes a panagusar iti social media iti kasasaad ti biag dagiti agtutubo.
Daytoy ti maikadua a tawen a saan a nairaman dagiti pagilian nga Ingles ti lengguaheda iti top 10, idinto a maika-23 ti Estados Unidos, maika-25 ti Canada, ken maika-29 ti Britain. (Associated Press/Manila Bulletin//Lito Hilidon/Bannawag)
