Inwaragawag ti baro a kangatuan a daulo ti Iran ti umuna a mensahena kadagiti iturayanna idi Marso 12, nga agtultuloy ti pannakidangadangda ken nagkari a mangipaay iti nakarkaro a panagsagaba dagiti pagilian iti Gulf Arab.
Daytoy ti impalgak ni Supreme Leader Ayatollah Mojtaba Khamenei kalpasan ti kinuna ni Israel Prime Minister Benjamin Netanyahu a ti panangraut ti Israel iti Iran ti mangparparnuay iti gundaway kadagiti umili ti Iran a mangtippuog iti gobierno.
"Adda dayta iti imayo. Mangparpartuatkami iti kasayaatan a kasasaad para iti pannakatnag ti rehimen," kinuna ni Netanyahu iti maysa a press conference, a nagpalawag kadagiti umili ti Iran.
Sipud panangrugi ti gubat, pinuntirian ti Estados Unidos ken Israel dagiti security checkpoint iti Iran tapno maawan ti kabaelan ti gobierno a manglapped iti panagalsa, segun iti Armed Conflict Location and Event Data (ACLED).
Daytoyen ti maika-13 nga aldaw ti gubat, a nangpangina manen iti presio ti lana a nagbalinen a $100 kada bariles, idinto a bimmaba amin nga stock iti sangalubongan gapu iti panagbuteng a mayalud-od ti gubat iti napapaut ngem iti maekspektar a kabayagna. (The Associated Press/Manila Bulletin//Lito Hilidon/Bannawag)
