Inkeddeng ti women ken children’s panel ti Senado itoy nga aldaw, Septiembre 24, ti panangangayna iti sesion ehekutibo kalpasan ti panangikari ni naikkat a Bamban, Tarlac mayor Alice Guo nga ipalgakna iti sesion ehekutibo ti “most guilty” iti likudan dagiti krimen a mainaig iti Philippine Offshore Gaming Operators (POGOs).
Inkari ni Guo daytoy kalpasan ti panangsalusod ni Sen. Joseph Victor “JV” Ejercito kenkuana no isuna ti “mastermind,” banag a nagkunaan ni Guo a saan nga isuna ti “mastermind.”
“Hindi po ako mastermind. Masasabi ko po na ako ay victim,” kinuna ni Guo.
Gapu itoy, kinuna ni Ejercito a no mangangayda iti sesion ehekutibo, addanto gundaway ni Guo a mangibaga no asino ti mastermind.
'Due process,' naipakat iti pannakaibalud ni Lopez
Innayon ni Ejercito: “Gapu ta kunam a maysaka a biktima, ngarud, adda ti pusom kadagiti biktima ti POGO, saan kadi?”
Insungbat met ni Guo nga iti kabayagen ti imbestigasion, patienna nga ammon ti komite, nangruna ti daulo daytoy a ni Sen. Risa Hontiveros, no asino ti adda iti likudan ti amin. (Hannah L. Torregoza/Manila Bulletin// Cles B. Rambaud/Bannawag)
