Autobiograpia ni LORENZO G. TABIN
NAGIMNAS KETDIN ti manglaglagip. Kaslaak la kanayon a main-indayon ket kas man la agngudo ti biag no isardengko ti manglagip. Di la ngata umapal dagiti saanen a mangipateg iti napalabas ket baliwanda ti pammatida a makabannog ti taliaw a taliaw; ta didanto met la makasublin iti naggapuanda? Wenno kunada met a no taliawda a taliaw, dida makadanon iti kayatda a panan? Ikkatenda koma iti bokabularioda dayta ket patienda a makapasalibukag ti dumngeg itoy numo. Kayatko ngamin nga ipaneknek nga awankami koma ditoy no awan ti napalabas a nagpatawanmi. Rumbeng nga agyamankami, nangruna dagiti sumarsaruno a kaputotanmi, nga adda iti agdama a henerasion. Dida kunkuna: kasano nga agyamankami iti kinakurapay a nariinganmi? Aha, ket wen, lamulamokayo a nayanak ket sakay la nakawesan idi mapug-awan ‘ta kuppokuppoyo!
ALLON TI BIAG: Walo A Dekada A Panagdaliasat (32)
Malagipko la ngarud ti naisaw-at naminsan ti buridekmi, nga apay a diak pay la ilako ti balay a nagubinganda idiay Kalye Pinatubo ket sabali metten ti aggigian, ken saankami metten a makaawid nga agassawa? Pakalaglagipak daydiay a balay, iti nagrigrigatak iti adu a tawen. Iti kaadda daydiay a balay, a daanen ken agur-urayen iti pannakarpuogna, yar-arigko man iti bagik, nga agur-urayen iti panagsuek ti initko idiay likud ti Bantay Magna...
Ha-ha, kitaenyo, kunakto met a naimnas ti manglagip! Ala, an-anusandak, ta dumaw-astayo idiay White House sakbay nga ipankayo kadagiti baro a lubongmi...
MAYSA TI IPAPANAWMI iti White House, ti mangsidsidir iti konsensiak no malagipko. Ni simpakada, nagbalkotkami a di nagpadpadlaw, nga inranami iti kaawan dagiti agassawa. Linasangmi ti double deck ket nagdardaraskami a nangikarga iti inupaanmi a lugan a pagyakarmi kadagiti gargaretmi. Awan met ketdi ti atrasomi iti upami ngem kas nasayaat a tao, ken nadayaw nga Ilokano, nasken koma met a nagpakadakami. Uray kaskasano, dakkel koma met a pagyamananmi ti panangyan-anus kadakami dagidi Mang Badong ken Doti, a dida nagpampanayon iti upa iti laksid ti kaadumi.
Maawatandakaminto ta nasayaatda a tao, inyan-andingayko lattan iti bagik idi addakamin iti lugan a mangitulod kadakami idiay Kalye Firmeza. Dakkel kanon ti nagbaliwan dayta a lugar kalpasan ti nasuroken a lima a dekada. Ngem nalawag pay la iti mugingko ti sigud a langa ti inakaranmi a lugar.
Adda iti lauden ti riles ti tren nga agpaabagatan. Idi damo, nakaluklukay ti angsenmi iti baro a yanmi. Simmango iti abagatan, panglawaen ti salas, dua ti kuartona ket adda iti nagbaetanda ti pagpaknian ken ti kosina.
Naipuesto ti double deck iti salas. Isu ti idda ni Miguela ken daydi Berta nga ading ni Abring.
Nalawa ti kuarto iti sulina iti daya ken amianan nga isu ti pinilik a para kadakami nga agassawa, ken da Lingling ken daydi Arvin Salacnib. Agaasem, manipud iti nakail-ilet a kuarto idiay White House, agkalkallasawankami iti kuarto uray no adda krib daydi Arvin.
Dakkel a desarming ti tawa ti kuartomi iti amianan. Nagustuak ta kasla nakalawlawa ti angsenmi no matan-awak ti kayo iti nagbaetanda iti balay iti amianan; ipalagipna dagidi kayo idiay Bantay Baybayabas.
Isu a diak napanunot ti kaawan ti kortina ti tawa. Diak pay no kua id-iddepen ti silaw ta masapul dagiti ubbing.
Ngem iti maysa a rabii, natiliwak ti dua a lallaki a mangim-imas a mangtantan-aw kadakami manipud kadagiti babassit a tawa ti akin-amianan a pasdek, a di masipar ti kayo.
Isu nga inyurnongak ti igatangko iti kortina tapno didakamin pagum-umaan a buyaen!
Iti Sabado wenno Domingo, awan ti adda klasena kadakami a sangakabbalayan; ken awan ti trabahomi ken ni Herman. Kunayo pay, arigmi iti nadanuman a tukak, a kasla bukbukodmi ti lubong. A kasla awan ti pasungadenmi a parikut.
Idi kuan, nainayon ni Melba Suero iti bilangmi—addan idiay Hawaii, napintasen ti biagna—ta, ta immay met nagbasa iti Manila.
Ad-addan a kasla agpiesta a bat-og dagiti bumalay ta immadu ti simmarsarungkar. Malaksid kadagidi kasinsinmi nga Andres Escobar ken Avelina a naikamang iti lakay a Hawayano nga ag-Laurente, adu pay dagiti sabali a kakabagianmi, ken gagayyemda a simmarsarungkar. Nakipagsarsarungkar pay daydi bassit a lalaki a nanobio ni Melba idiay Cabugao Institute, nga immay met nagbasa iti Manila.
Adda pay dagidi dua a babassit nga agkabsat a babbalasang a taga-Tarlac, a diak malagipen no kasano a nagaammoda kada Herman.
Malagipko la ida ta kurangda la ti nakakita ken ni Herman iti paggartemanda la unay a marabamban a salamagi. Masansanda a dumaw-as iti dagusmi ket ti la adda a masalsaludsodda. A kasta unay ti panagisem-isemda, ken palpalamuyotenda man ketdi ti pannakisaoda!
Dida la ammo a kadagidi a panawen, addan panggep ni Herman a mangsarigsig ken ni Miriam Manalo idiay UP Main Library.
Ngem no umay daydi Insan Andres iti uray ania nga or-oras, sabali ti kompas ti tokar iti Firmeza.
Sumangpet a nakarkaro pay ngem nakirog a rasa ti rupana. Kasla agar-aruyot ti dara kadagiti matana. Kasla mapuri a bittaog a dalapusen ti tornado no sumungad. Kasla parpar a plaka no aglabid iti kasla binugbog, a no dadduma, agugaog a makalagip kadagiti di mamatpati kenkuana, a kakabagianna. Ti lupotna, kasla kakkali a kamas.
Dina ketdi ammo ti makiriri. Saan nga agkarkarit.
Ngem no agranada ken ni kabagisna nga Avelina, dimo ammo no agduduetoda nga agkanta wenno agdung-aw; no kasdiay a makainum met ti babai.
No templado ti sairo a nangituray iti daydi Insan Andres, ammona met ti agkatawa. No malagipna daydi nobelak a “Pakpakawan, Berde”, kasla di mapugsat a sinulid ti isemna a danggayan ti kasla kirriit a bunga ti kamantiris a kilit dagiti matana. Ket ulit-ulitenna dagidi nakalugananna a nangibagaanna nga isu ti autor ti kunak a nobela.
Maysa man ketdi a pakalagipak ken ni Avelina ti masansan a panangitugotna iti utek ti baka wenno baboy. Adobuenna, ket dandani awan ti mabagina apaman a malutona ta pagraranggawan dagiti di makarkaraman a madanonna. Idi damo, impagarupko a diak mairusok ti utek ta maariekak iti dalayudoyna, a kas man la sibibiag. Ngem idi maramanak, kunam pay, saanakon a nagpaudi a nagipapel!
“Isu pay a gatangen!” ipalpallilitko ken ni kaingungot.
Iti naminsan nga awan sa ti malagip nga aramiden da Abring ken ni Herman, sinipsiputanda ti ipapan daydi Anti Rosa iti banio. Kinuniaan ni Abring ni Herman. Siningdananda ti balballugo ti ridaw ti banio sada inkamang iti adigi ti double deck. Agel-ellekda a nagpakni iti salas.
Idi rummuar koman daydi Anti Rosa, agtabtabbugan iti banio ta dina malukatan ti ridaw.
Nagdanag met la ni Abring. Nagin-inayad a nangikkat iti galut ti ridaw.
Kasla napulupuluan iti sili’t sairo ti rupa daydi Anti Rosa iti nalaus a pungtotna ket ad-adda a timmingra ti kayumanggina. Nagsapul iti pinangsagsagna ken ni Abring, agingga a nabannog.
IDI DANDANIMIN MAKUN-OS ti makabulanmi idiay Firmeza, naimuttalat iti ridaw ti baket nga akimbalay ket nakasiksikkil dagiti sikona iti agdaldalayudoy a bakrangna.
“Narito ako para ipaalala sa inyo na malapit na ang bayaran... para wala kayong masabi!”
Dagidi kasla nadanuman a tukak, kellaat a kasla dinalapus ti kasibsibet a bagyo.
Awan pay ti simmangpet nga abasto dagiti taga-Pudtol.
Awan pay ti impaw-it ni Marilou idiay Mecca a para ken ni Miguela.
Ti nagasat a balay iti Firmeza, arigna sinallukoban ti manto iti panawen ti piesta dagiti natay.
Nagpalpaliiwak.
Ania ti mapaspasamak kadagiti pagbagasan dagiti agad-adal iti Manila?
Awan damag kadagiti agpagapas idiay Pudtol.
Awan damag nga aggapu idiay Mecca, California a yan ni Marilou—ania ti inaramid ni Nana Felicing kenkuana?
Im-impek a pagammuan lattan ta adda ti buy-ongan a baket a mangtaragatag iti ridaw ti dagusmi.
Ken mangpatapuak kadakami.
Madanagan daydi Anti Rosa, pinakuyog ni Miguela ken ni Samar a mapan umawag ken ni Marilou iti numero ti telepono daydi Nana Felicing.
Nagpulong ni Samar idi sumangpetak iti rabii. Tarattattat kano ti insungbat ni Marilou: awan kano ti kuartana! Inungtanna ni Miguela ket imbagana a dinton umaw-awag ta nangina ti long distance call, nangruna no collect call. Aguray lattan iti mabalinna nga ipuruak. Dandani dida nangngeg ti agarup nairidis a kinunana, a kasla nagamak nga adda makangngeg kenkuana: diak nagay-ayatan ti yaayko ditoy!
Nasarait dagiti nalitem a bibig daydi Anti Rosa iti nadamagna.
Siak ti ad-adda a nakumikom. Kasanon no saan a tumulong dagiti pangnamnamaan dagiti kakaduami? Diak kabaelan a yabaga ti renta ti sangabukel a balay. Diak met ketdi masinunuo no ania ti nagparikutan dagiti taga-Pudtol ken Mecca a gapu ti dida pakaipaw-itan. Diak pay idi ammo ti sasaaden dagiti kas ken ni Marilou. Dimi ammo no ania ti nagtulagan daydi Apo Rosa a kabsatda iti daydi Apo Barbers, ken ni Nana Felicing iti panangalana ken ni Marilou.
Nalagipko la ngarud ti pinanawanmi a White House. Agpayso a nailet ngem awan ti nangkarkarintar kadakami nga agbayad iti renta. Uray no dakami la ken ni Samar a kaduami ni Baby nga agay-aywan idi ken ni Lingling, ken daydi Arvin Salaknib, kabaelak a yabaga. Makatulong idi ti masingsingirko a bayad dagiti sursuratek nga ipabpablaak ti Bannawag, uray kaskasano.
Ti met la bagik ti binabalawko. No saanak nga immannugot iti singasing dagidi nakidagus, nga umakarkami ta tumulongda, saanak koma a nagparikut iti kasdi.
Numona ta kumarkaro met idin ti sakit daydi Arvin. Ti la pagremremedioak iti kuarta a pangipakitami iti ospital. Umdas la idi a tarayanmi dagiti dispensario iti asideg; awan ti pagbayadko iti ospital.
Ngem awan ti nabati a pagpiliak. Makaasianak unay iti daydi Arvin Salacnib. Kanayon nga agsansaning-i. Kanayon a nakasadag ti ulona iti abaga ti inana a dandani awan sardengna a mangilillili tapno laeng sumardeng koma. Kasla awan ti tulang ti tengngedna a mangtengngel iti leppay nga ulona. Agling-et pay iti napigket ken nalamiis.
Masapul nga ipakitami iti nalaing a doktor. Masapul nga agsakripisioak. Impadpad-engko ti mabalin manen a pannakasingirko idiay Bannawag. Ti pay ket bainek idin, ket awan met la ti sabali a pagkamangakon no di dagiti editor. Naimbag la ketdi ta mannakaawatda unay, nangruna daydi Manong Jun, a naital-o a literary editor idi naglusulos ni Mang Amor Andaya ta agsagsagana idin a mangala iti bar exam. Uray sa met idin no di pay mabalin ti agsngir, balbalinendan. Isu a no aggapuak idi iti eskuela iti rabii ken kaiwarwarsik ti buggok, sanguek manen ti nakasaang a paset ti nobela a madama a rumrummuar.
Kasdi ti inaramidko. Napanak nangsingir iti imbayadko iti ospital a nangitarayanmi iti daydi Arvin Salacnib.
Saan nga iti dispensario.
Idiay UST Hospital!
Impatpatulengko daydi immay nagsingir iti renta ti dagusmi.
Inunak ti salun-at daydi anakko.
Indawdawatko a di koma mangibaon ti akimbalay iti umay agipuruak kadagiti gamigammi iti ruar!
Sakbay a rimmuarkami iti daydi nga aldaw, binilinko dagidi napanawanmi a mapanda agsapul iti akaranmi a nalaklaka ti renta.
Idi lumas-udkami iti pasdek ti University of Santo Tomas Pediatric Hospital, nagsubli ti nadagsen a riknak a bunga ti padasko iti daydi doktor idiay Fabella Memorial Hospital.
Indawdawatko a sapay koma ta awan ti kasdi a doktor iti UST. Makaulaw ti panagsipsiputko kadagiti aglilinnagud a sangaili ken dodoktor ken nars.
Nasulek ti imatangko iti maysa nga ubing nga as-asistiran dagiti nars iti maysa a suli.
Nakalawlawag pay la iti mugingko ti buya uray no manon a dekada ti napalabas. Kasla piglat ti letteg a di napunas iti lagipko. Kasla diak patien ti nakitak; no istoria la koma ti sabali, diak la ketdi patien, ngem nasaksian a mismo dagiti dua bukel a matak!
Nasiripko ti lumlumsot a bagis ti ubing iti kimmotna! Agsansaning-i idinto nga agap-apput ti inana a mangbuybuya iti mapaspasamak.
Iti nakemko idi, diak ammo no kasano a maisublida ti bagisna.
Ngem awan ti naalinagaak a danag iti mata dagidi mangas-asistir; langada ti natalna latta.
Kalpasan ti panangrikoniser dagiti tao iti ospital iti daydi Arvin Salacnib, pinagpilidakami no kayatmi nga ibati wenno isubliminto.
Awan ti pagbayadmi iti panagyanna iti ospital isu nga inkeddengiko nga agsublikaminto tapno maammuanmi ti resulta ti check-up.
Ad-addan ti dagsen ti mugingko idi agsublikami iti ospital.
“Huwag kayong mabibigla,” kinuna ti doktor, “meningitis ang sakit ng anak n’yo.”
Diak kayat a patien ti nangngegko; nadagsen nga awaten ti palawag ti doktor. Diak kayat a panunoten a napukawmi la ngaruden daydi Lorimar, mapukawmi manen ti maikatlo.
Naliday dagiti mata ni Samar a nangsakruy iti daydi Arvin bayat ti iruruarmi iti ospital. Kasla ubbaw ti ulok ket awan ti masnop a turongen ti panunotko.
Masapul a patibkerek ti pakinakemko.
Indawdawatko iti Apo a saan koma a mapasamak ti agbalbalay iti panunotko.
IMBUKBOKKO TI PANUNOTKO iti trabahok. Inurnosko dagiti sangsangpet a manuskrito ken kopia ti Bannawag, Bisaya, ken Liwayway. Nagaramidak iti index card dagiti nakompleto a manuskrito dagiti nobela, ken naurnong a sarita dagiti mannurat. Uray pay dagiti salaysay ken dandaniw, insaganak amin a mapa-bind. Nasaok idin nga ammok no asino dagiti kadalusan ti manuskrito. Maymaysa wenno dudua laeng ti matandaanak a dandani awan ti makitam a naedit iti manuskritona. Ni Hues Guillermo R. Andaya—no di pay nagretiro—ken ni Edilberto H. Angco a sigud a taga-Ilocos Sur ngem agnaed itan idiay San Fernando, La Union. Uray dagidiay editor, adda makitam a sinammata kadagiti manuskritoda, nga isuda met laengen ti nangedit.
Saan a nailimed kadagiti katrabahuak ti kaadda ti mangburburibor iti panunotko gapu iti naisalsalumina a kinaulimekko. Maysa ni Rosalie Faderon kadagidi nakadlaw—itay laeng nabiit a naammuak idi sinuratak iti Facebook ken Messenger a kalpasan ti panagtrabahona iti sangapulo a tawen iti Filipiniana Section, nagbalin a faculty member iti uppat-a-pulo a tawen iti Institute of Library Science idiay UP, sa nagretiro a dekana.
Maysa daydi Valerio L. Nofuente, a nagdamdamag iti parikutko, a nambaranna a nangisagidsagid iti panangkiwkiwna kaniak a sumurot iti natan-ok a tignay kano dagidi radikal, a diak idi maawatan. Ngem kinapudnona, iti isipko, awan bibiangko no natan-ok wenno barisungiad ti panggep ti grupoda. Awan panawenko kadagidi a banag; kapatgan ti pamiliak. Maas-asianak idin ken ni kaingungot ta adtoy a kaduak nga agparparikut idinto a no sabali ti naasawana, nalabit a di koma agsagaba iti tuok iti sidongko.
Gumilgil-ayab idin ti aron ti komunismo a sinungrodan ni Joma Sison babaen ti panangkiwkiwna kadagidi radikal nga estudiante ti UP bayat ti panangisurona sadiay; a nagsaknap kadagiti unibersidad kas iti UE, PUP, ken dadduma pay. Natangken dagidi maitagtag-ay a gemgem dagiti mamasirib nga estudiante, a nangipagpagarup a nasirsribda ngem ti gobierno nga ipappapilitda a korap.
Nakaar-ariwawada kadagiti lanlansangan. Nagdadakkel dagiti bandalismoda kadagidi pader iti sadino man a kayatda. Adu pay dagidi panawen nga awan ti klase gapu iti aramidda. Malagipko a nagkampuanda idi agangay ti estasion ti radio ti UP ket sadiay nga impulpulikkaawda ti kinadakes ti gobierno daydi FM.
Nasaok kadi idin a daydi Kompadre Tino, a ninong ni Lingling, napan met nakiraman a nagitagtag-ay iti plakard ken nangipukpukkaw iti pammatida a rinuker daydi a gobierno? Naaringan laeng kadagidi adu a nangipukpukkaw iti patienda nga umno. Diak idi maawatan ta iti baet ti kina-Ilokanona, a kas iti daydi FM, nagbalin a maysa kadagidi radikal. Naammuak idi agangay a saan la nga is-isu ti Ilokano a kimmontra iti daydi a gobierno—kalpasan ti mano a dekada, idi sabalin ti presidente ti Pinas, ken idi addan daydi Kompadre Tino idiay New Jersey, indawat dagidi nadangran bayat ti panangitagtag-ayda kadagidi natangken a gemgemda ken adu a nalabaga a bandera, ken panagpuorda iti ladawan dagidi lider a kabusorda, ken kalpasan ti panagayus ti darada kadagiti lanlansangan, pinanggepda a singiren ti danios, kano, iti kinaranggas a sinagrapda iti ima ti gobierno.
Naammuak a mismo iti daydi Kompadre Tino idi empleadon iti UP, a naparpar met ti ulona idi nairaman iti rapukrapok idiay University of the East—panagkunak, balonna daydi a linak-amna idi immayen ditoy America, idiay New Jersey, nga isu ti nagpakadaanna itoy a lubong iti di pay unay nabayag.
KAS KADAGITI IMMUNA nga inakaranmi, intugotmi manen ti nagasat a double deck idi umakarkami iti Lepanto. Adda pay dakkel a karton a dram—sigud a bariles a nagbasiuan ti gatas a diak malagipen no nakaalaanmi. Nadagsen ta adu a gamigam ti inkargami.
Adda iti maikadua a kadsaaran ti salas a pannakakuarto ti inupaanmi. Diak malagip no asino ti nakasarak iti daydi a balay ti ninagananmi iti Bruha ta napalalo ti barisawsawna. Masapulna ngata ti kuarta, masapulmi met ti akaranmi. Diak manen malagip no masapul idi ti pauna nga upa wenno saan.
Adda ti marmarba a pagpaknian iti amianan a sikigan ti balay. Nakaam-amak, no dika agannad, amangan no mailabsongka no inka umigid.
Inanusanmi ta dimi idin kabaelan a bayadan ti pinanawanmi idiay Firmeza.
Agtataruptop idi ti parikutko. Dagidi kakaduami, kasla awan parparikutda. Uray no kasdi ti kasasaadmi, masangoda pay la ti aggagarakgak.
Nagustuan daydi Bruha ni Abring ket isu la ti palubosanna a mapan agdigos iti banioda iti sirok. Isu la ti palubosanna a mapan agbuya iti telebisionna.
Awan simmayaatan ti kasasaad daydi Arvin. Dumakdakkel met idin ni Lingling ngem nailling. Kas man la mamalnoris idi ta nakuttong. Malagipko nga idi addakami idiay Firmeza ti nagsursuruanna a nagna. Nasurok sa idin a dua ti tawenna. No di pay imbaga ni Abring a sinitenna ’diay kimmotna, saan koma pay a nagna. Malagipko ti nagkintal a balikasna: “atta takki yay kimmutko!”
Malagipko man ketdi ita, a diak idi malaglagip ti gapu daydi kasla naidardaras a panaglantipmi iti kaingungotko. Kunak idi, maspulko ti kasapulak nga agpanunot, bareng lumag-an ti imetko. Kaarngi met ti adda idi iti panunotna. Gapu iti kinaiget daydi manangna a Saling, ken ti durog ni Mang Rogie a kaanakanna, a mangasawan tapno mapanawanna daydi manangna.
Am-amirisek ita, nga arigmi iti simotsimot a nagsebba iti apuy. Ti la agdama idi ti adda iti panunotmi. Kas iti naibagak iti daydi Mang Saling idi dinamagna no kasano a biagek ti asawak: ‘Ni la Apo Dios ti makaibaga...’ Malagipyo daydi kunak a dida idadar-ay iti kallaysami idiay Cabugao?
Ket marikriknak idin ti sungbat ti amin a panagdardaras, a nupay napudnokami iti tunggal maysa, arigna dimi mayangsan dagidi nagtataruptop a pannubok.
No dadduma, maisawsaw-atko idi ti dua a balikas: Apo... Apo!
Ituloymo ti agbasa. Aglitlitek pay laeng iti pispisko ti patigmaan ni Manang Namnama Hidalgo. Dika matulongan nga i-promote iti trabahom no dika agbasa.
Ket iti baet dagiti agtataruptop a pannubok, sumrekak iti bigat idiay Filipiniana Section. Agtarusak idiay Manuel L. Quezon University no aggapuak iti trabaho; no dadduma, makaturturogak iti JD ken Yujico Bus a pagluglugananmi.
Naminsan a pannakaturogk, idi sumrekak iti klasek, nagtugawak iti asideg ti likud. Idi makariingak iti batog ti UST idiay España, awanen daydi petakak a yan dagidi IDk. Impagarup ngata ti mannipdut nga adu ti kuartak. Lokdit a mannipdut, dina la pilien ti dukotanna! Ti la tabbogak, inlunlunodko ti diak am-ammo a karasaen! Agasem, nagadu la ngaruden a parikutko, innalana pay dagidi napateg nga IDk.
Agbalbalonkami idi ken ni Herman; adda panganan iti sidiran ti library ngem dimi kabaelan ti presio. Isu nga inyan-anusmi ti agbalon. No dadduma, mapakpakbo ti digo ti balonmi, digo ti adda la ditan a masida!
Dikami nakapagbayag idiay Lepanto. Kanayonen nga agtabtabbuga daydi Bruha gapu ngata ta dina maparukma ni Abring.
Idi pumanawkami, nagsullat iti sakaanan ti agdanna ta dinakami palubosan.
“Pakpakawan! Diak pay la mapan sumuso kadaytay kasla takong ‘diay Pudtol!” kinunana, nga intanupra pay. Kasla kano agsaringgayad ti suso daydi uy-uyawenna, a nagpasaganna met laeng!
Ngem idi di latta papagnaen daydi Bruha, nakapungtot metten ni Abring ket kalpasan a maibabami daydi nagasat a double deck, impakaruskosna daydi dakkel a bariles ket nagtartaray met la a naglisi daydi Bruha a kasta unay ti bariwakwakna.
Umakarkami iti sabali manen a nagsakduak iti naidumduma a padas! Kitaenyo no ania ti pakaigidiatan ti Times Street kadagidi immuna a kalbariomi!
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26
