Ikkan ti Anti-Agricultural Economic Sabotage Act iti sangi ti gobierno kontra kadagiti smuggler a mangparparigat kadagiti mannalon, mangngalap ken dagiti Filipino consumer, kasta ti kuna ni Presidente ti Senado Francis “Chiz” Escudero.
Naituding a pirmaan ni Presidente Ferdinand Marcos Jr. ti Anti-Agricultural Economic Sabotage Act, maysa a prioridad nga addang ti administrasion, inton Huebes, Septiembre 26.
“Maysa a dakkel nga addang ti pannakaipasa ti Anti-Agricultural Economic Sabotage Act iti pannakaipatungpal ti panggep ti gobierno a mangyeg iti nalaka a taraon iti tunggal pagtaengan,” kinuna ni Escudero.
Manamnama a labanan daytoy nga addang ti nasaknapen nga smuggling, profiteering ken hoarding kadagiti produkto ti agrikultura tapno lumaka dagiti makmakan ket kabaelan a gatangen dagiti tao, ken tapno dumakkel ti mapastrek dagiti mannalon. Protektaran ti Anti-Agricultural Smuggling Act ti publiko iti panagadu ken panagwaras dagiti taraon a sub-standard wenno uray dagiti saanen a mabalin nga ipauneg ti tao.
'Due process,' naipakat iti pannakaibalud ni Lopez
Iti babaen ti nasao a linteg, dagiti aramid a makatulong iti pannakasabotahe ti ekonomia iti agrikultura kas iti panagibiahe ken panagidulin kadagiti naipuslit a tagilako, mabalin nga agresulta iti pannakaibalud iti 20 agingga iti 30 a tawen ken pannakamulta iti mamindua iti pateg dagiti produkto ti agrikultura ken panagkalap a nainaig iti krimen.
Kinuna ti senador a ti baro a linteg, mangted ballaag nga usaren ti gobierno ti amin a wagas tapno maidarumna dagiti adda pannakainaigna iti smuggling, hoarding, profiteering ken dadduma pay a mananggundaway nga aramid iti sektor ti agrikultura. (Hannah L. Torregoza/Manila Bulletin// Juan A. Asuncion/Bannawag)
