Impakaammo ni Presidente Ferdinand R. Marcos Jr. ti gandat ti pagilian a patibkeren ti singgalut daytoy iti Italy, India, Ireland, Finland, ken iti European Union (EU) kas pangpasangbayna kadagiti baro nga embahador dagiti nadakamat a pagilian iti Malakanyang itay Septiembre 23, 2024.
Iti panangabrasana ken ni Embahador ti Italy Davide Giglio, namnamaen ni PBBM a makatulong ni Giglio iti pannakaparayray ti singgalut ti Filipinas ken Italy.
Ti Italy ti maikapat a kadakkelan a trading partner ti Filipinas iti European Union (EU). Idi 2022, rinambakan ti Italy ken Filipinas ti maika-75 a tawen ti relasionda.
Nangidatag met iti credentials-da dagiti dadduma pay nga embahador a da Harsh Kumar Jain ti India, Emma Hickey ti Ireland, Saija Nurminen ti Finland, ken ni Mariomassimo Santoro ti EU. (Argyll Cyrus Geducos/Manila Bulletin//Lito Hilidon/Bannawag)
