Impanamnama ti Philippine Statistics Authority (PSA) ti pannakaiprinta ken pannakaipatulod dagiti pisikal a national ID kadagiti amin a nagparehistro (registrants).
Kinuna ni Claire Dennis Mapa, PSA undersecretary ken national statistician, a nakasaritadan dagiti alternatibo a service provider tapno maileppasen ti panagiprinta kadagiti national ID.
“Namnamaenmi a marugian ti decentralized printing kadagiti opisina probinsial ti PSA iti maudi a paset ti tawen,” kinuna ni Mapa.
Iti agdama, nakairekord ti PSA iti 90.5 a milion Filipino a nagparehistro para iti National ID. Addan 55.5-milion a naiprinta a kard (pisikal), ket 53.8-milion ti naiteden kadagiti registrants. Kinuna ni Mapa a naipatulod metten ti nabati a 1.7-milion a pisikal a kard babaen ti Philippine Postal Corporation (PHLPOST) ken PSA personnel ket manamnama a maawat dagiti registrants dagiti kardda iti kabiitan a panawen.
Ruth Padilla, agngayangay a kas Diputado ti Nueva Vizcaya
Iti sabali a bangir, adda metten naited a papel a National ID (ePhilIDs) iti 46-milion a registrants idinto nga adda met 18.4-milion a registrants a naka-access iti digital ID-da.
“Iti sabali a pannao, addan 53.8 a physical national ID, 46-milion nga ePhilID, ken 18.4-milion a digital national ID nga addan iti ima dagiti registrants. Kayatna a sawen nga addan ID ti kaaduanna, no di man amin, a registrants,” inlawlawag ni Mapa.
Innayon ni Mapa nga ania man kadagitoy a national ID, mabalin nga usaren ti registrant iti pannakitransaksionna kadagiti kadagiti entidad iti man gobierno wenno sektorpribado. (Gabriell Christel Galang/Manila Bulletin// Cles B. Rambaud/Bannawag)
