Saan a dimmar-ay ni Bise Presidente (BP) Sara Duterte iti debate para iti 2025 a badiet ti Office of the Vice President (OVP) iti Kamara itay Septiembre 23, 2024.
Kinuna ni daulo ti Minoria Marcelino Libanan a nupay adda nangibagi iti OVP, awan met ti naisurat a pammalubos wenno palawag iti saan nga idadar-ay ni BP Duterte.
Kinuna ni Libanan nga 10:00 ti agsapa ti naituding a pannakataming ti badiet ti OVP, ngem gapu ta awan ti mangibagi, tinamingda ti badiet dagiti dadduma nga ahensia.
Nayallatiw ti debate iti badiet ti OVP inton Septiembre 25.
'Due process,' naipakat iti pannakaibalud ni Lopez
Iti sabali a bangir, ni Diputado ti Lanao del Sur 1st District Zia Alonto Adiong koma ti mangidepensa iti PhP733 a milion a singasing badiet ti OVP.
Ngem maibatay iti surat ni BP Duterte ken ni Adiong idi Septiembre 11 a nairuar itay Lunes (Sept. 23), impetteng ti OVP a nalpasen nga indatagda dagiti kasapulan a dokumento iti House Committee on Appropriations.
Segun ken ni House Speaker Martin Romualdez, gandat nga aprobaran ti Kamara ti singasing a PHP6.352 a trilion a nailian a badiet inton Septiembre 25.(Filane Mikee Cervantes/PNA//Lito Hilidon/Bannawag)
