Agbalor iti P27.9 a milion a maatap a shabu ken marihuana ti nasamsam ti Police Regional Office-Cordillera iti 31 nga anti-illegal drug operations nga inwayatda manipud idi Septiembre 16 agingga iti 22.
Pito met a maatap a drug pusher ti nakemmeg.
Nasamsam ti polisia ti mapan a 107,430 a kapuon ti mabalinen nga apiten a mula a marihuana, 6,276 a bunubon a marihuana, 51 a kilo a naipagango a bulong ti marihuana, ken 12.96 a gramo a shabu.
Kadagupan dagitoy nasamsam a marihuana ken shabu ken nakemmeg a pusher, nakakompiskar ti Kalinga Police Provincial Office kadagiti ilegal a droga nga agbalor iti PhP22,020,240 ken nakakemmeg iti dua a drug pusher a maibilang nga “street-level individual” wenno SLI; ti Benguet PPO, P5,870,188 ken maysa a “high-value individual” wenno HVI a drug pusher; ti Baguio City Police Office, shabu nga agpateg iti P33,660 ken dua a drug pusher (maysa nga HVI ken maysa nga SLI); Abra PPO, shabu nga agpateg iti P14,280 ken maysa nga SLI; ken Apayao PPO, shabu nga agpateg iti P6,800 ken maysa nga HVI. (Zaldy Comanda/Manila Bulletin// Cles B. Rambaud/Bannawag)
